शनिशिंगणापूर: महिलेकडून अर्ज दाखल

सोनई : शनिशिंगणापूर देवस्थानच्या विश्वस्तपदासाठी शिंगणापूरमधील नूतन गोरक्षनाथ शेटे या महिलेने गुरुवारी अर्ज भरला. या पदासाठी सहा महिला प्रयत्नशील असल्याची माहिती आहे. एका महिलेच्या पतीने अर्ज भरल्याने तिचा अर्ज भरण्याचा निर्णय रद्द झाला आहे. येत्या दोन दिवसात अर्ज दाखल करण्याबाबत निर्णय घेणार असल्याचे काही महिलांनी ‘लोकमत’ला सांगितले. शिंगणापूर देवस्थानच्या विश्वस्तपदावर काम करण्याची संधी मिळावी, यासाठी अनेकांची सध्या लगबग सुरु आहे. सर्व आवश्यक कागदपत्र जमा झाली असून येत्या दोन दिवसात अनेकजण अर्ज भरणार आहेत. आतापर्यंत अर्ज भरणारांची संख्या शंभराहून अधिक झाली असून शेवटच्या दोन दिवसात आणखी भर पडणार आहे. शनिदेव ही देवता नवग्रहात श्रेष्ठ असून या देवतेची सेवा करण्यास मिळावी, यासाठी पुरुषांसह अनेक महिलांनीही पुढाकार घेतला आहे. मागील वेळी काही महिलांनी अर्ज भरले, मात्र त्यांना संधी मिळाली नाही, असे अर्ज भरण्याची तयारी करीत असलेल्या महिलांनी सांगितले. मागील वेळी एकाही महिलेने अर्ज भरला नव्हता, अशी माहिती विश्वस्तपदासाठी अर्ज भरलेल्या आदिनाथ बानकर यांनी सांगितली. द्वारका भूतकर, शालिनी लांडे, नंदा दरंदले, वैशाली तुकाराम बानकर या महिला अर्ज भरण्याची तयारी करीत आहेत. (वार्ताहर) विश्वस्तपदाचे काम करण्याची संधी मिळाल्यास महिला भाविकांच्या प्रश्नांना प्राधान्य देऊ. मानसशास्र विषय घेऊन बीएची पदवी मिळविली आहे. मध्यंतरी जी घटना घडली, त्यावेळी महिला सुरक्षा रक्षक चौथऱ्यानजीक उपस्थित नव्हती. भविष्यात अशा घटना घडू नये आणि येथील देवस्थानने घालून दिलेल्या रूढी आणि परंपरांचा सन्मान केला जावा, यासाठी सातत्याने प्रयत्न केला जाईल. -नूतन शेटे, स्थानिक रहिवासी, शिंगणापूर.