अहमदनगर : नगर शहरातील बालिकाश्रमरोडवरील दुकानांवर भरदिवसा दरोडा टाकून पैसे लुटणाऱ्या टोळीचा म्होरक्या व कुख्यात गुंड अजय राजू पठारे याला मंगळवारी स्थानिक गुन्हे शाखेच्या पथकाने सिद्धार्थनगर येथून जेरबंद केले.
नगर शहरातून तडीपार असलेले विजय राजू पठारे व अजय राजू पठारे यांनी त्यांच्या साथीदारांसह २० मार्च रोजी नगर शहरातील बालिकाश्रम रोडवरील जाधव मळा येथील कापड दुकान व सायकलच्या दुकानात घुसून दुकान मालकांना मारहाण करत त्यांच्याकडील पैसे हिसकावून नेले होते. याबाबत तोफखाना पोलीस ठाण्यात गुन्हा दाखल झाला होता. या गुन्ह्याचा समांतर तपास करत असताना अजय पठारे हा सिद्धार्थनगर येथे त्याच्या घरी आला असल्याची माहिती स्थानिक गुन्हे शाखेचे निरीक्षक अनिल कटके यांना मिळाली होती. माहिती नुसार स्थानिक गुन्हे शाखेचे सहाय्यक पोलीस निरीक्षक मिथुन घुगे, सोमनाथ दिवटे, उपनिरीक्षक गणेश इंगळे, हेड कॉन्स्टेबल दत्तात्रेय हिंगडे, संदीप घोडके, पोलीस नाईक सुनील चव्हाण, संदीप पवार, शंकर चौधरी, सागर ससाने, आकाश काळे यांच्या पथकाने आरोपी पठारे याला अटक केली. पठारे यांच्याविरोधात तोफखाना पोलीस ठाण्यात गंभीर स्वरूपाचे गुन्हे दाखल आहेत. आरोपीला पुढील कारवाईसाठी तोफखाना पोलिसांच्या ताब्यात देण्यात आले आहे. जिल्हा पोलीस अधीक्षक मनोज पाटील यांच्या मार्गदर्शनाखाली ही कारवाई केली.
........
विजय पठारे फरार
अजय पठारे व विजय पठारे यांच्यावर विविध गुन्हे दाखल असून, दोन वर्षांपूर्वी नगर शहरातून त्यांना तडीपार करण्यात आले होते. या गुन्ह्यात पोलिसांनी अजय पठारे याला अटक केली असली तरी विजय पठारे मात्र अद्यापपर्यंत फरार आहे.