अहमदनगर : वारंवार बिघाड होत असल्याने, तसेच क्षमता कमी असल्याने अंगणवाडीसेविकांनी आपले मोबाइल शासनाला परत केले आहेत. त्यामुळे अंगणवाडीसेविकांना दैनंदिन रेकाॅर्ड मोबाइलवरून पुन्हा रजिस्टरवर घेण्याची वेळ आली आहे. नगर जिल्ह्यात एकूण ५ हजार ५५५ अंगणवाडीसेविकांपैकी १,९३८ अंगणवाडीसेविकांनी मोबाइल परत केले आहेत.
अंगणवाडीतील पोषण आहार व त्यासंबंधीची माहिती ऑनलाइन पद्धतीने भरण्यासाठी सरकारकडून अंगणवाडीसेविकांना मोबाइल देण्यात आले आहेत. पोषण आहार स्थिती, कुटुंब व्यवस्थापन, दैनंदिन आहार, गृहभेट नियोजन, शिधावाटप नोंद, अंगणवाडी केंद्र व्यवस्थापन मासिक प्रगती अहवाल याबाबतची सर्व माहिती अंगणवाडीसेविकांना ऑनलाइन पद्धतीने बालविकास प्रकल्प अधिकारी कार्यालयाकडे पाठविणे बंधनकारक आहे. मात्र, त्यामध्ये विविध अडचणी येत असल्याने सेविकांनी मोबाइल परत केले.
मोबाइल परत केल्याने ऑनलाइन पद्धतीने अहवाल पाठविणे बंद झाले आहे. सध्या जिल्ह्यात पोषण माह अभियानाची व्यापक प्रमाणात जनजागृती केली जात आहे. या अभियानांतर्गत राबविण्यात येणारे उपक्रम, कार्यक्रमांची माहिती ऑनलाइनऐवजी आता ऑफलाइन पद्धतीने अंगणवाडी केंद्रातून बालविकास प्रकल्प स्तरावर पाठविण्यात येत आहे. त्यामुळे त्यांचा कामाचा ताण वाढला आहे.
------------
जिल्ह्यातील एकूण अंगणवाड्या - ५,५५५
अंगणवाडीसेविका - ५,५५५
किती जणींनी केला मोबाइल परत - १,९३८
--------------
म्हणून केले मोबाइल परत
निकृष्ट दर्जाचे मोबाइल, मोबाइलमधील रॅम कमी असल्याने हँग होणे, दुरुस्तीचा खर्चही मोठा, शिवाय पोषण ट्रॅक ॲपवर मराठी भाषेचा अभाव आदी कारणांमुळे अंगणवाडी कर्मचाऱ्यांनी मोबाइल परत केले आहेत.
------------
मोबाइल वारंवार हँग होत असल्याने कामे होत नव्हती. उलट कामांमध्ये या मोबाइलमुळे व्यत्यय येत होता, शिवाय गरम होणे, वारंवार बंद पडणे, रॅम कमी असल्याने हँग होणे असे प्रकार व्हायचे. त्यामुळे मोबाइल परत केले.
- शोभा पवार, अंगणवाडीसेविका, कोल्हार, ता.राहुरी.
---------------
त्या मोबाइलवधील पोषण ट्रॅक ॲपवर मराठी भाषेची सोय नाही. त्यामुळे अहवाल भरताना अडचणी यायच्या. मोबाइल वारंवार हँगही होत. त्यामुळे मोबाइल परत केले. आता नवीन रजिस्टर घेऊन त्यात अहवाल भरला जात आहे.
- रतनताई गोरे, अंगणवाडीसेविका, कारेगाव, ता.श्रीरामपूर
--------------
५ हजार ५५५ पैकी १९३८ अंगणवाडीसेविकांनी मोबाइल परत केले आहेत. पोषण ट्रॅक ॲपमध्ये मराठी भाषेची सोय नाही, याबाबत कर्मचाऱ्यांचा आक्षेप होता. तसे शासनाला कळविले आहे.
- मनोज ससे, उपमुख्य कार्यकारी अधिकारी, महिला व बालकल्याण विभाग.
-----------------
तालुका अंगणवाडीसेविका मोबाइल परत केलेल्या सेविका
अकोले ३४० २९०
राजूर २६२ २२३
संगमनेर १६५ ३१
घारगाव १ २३१ १२८
घारगाव २ १६६ ४३
कोपरगाव २५० ०
राहाता ३१८ ७४
श्रीरामपूर २६२ २२२
राहुरी ३६२ ०
नेवासा २४८ ०
वडाळा १९३ ०
नगर १ १९६ ०
नगर २ २९ १०
भिंगार १६९ २७
शेवगाव ३२५ ०
पाथर्डी २९२ ०
कर्जत ३८१ ३२४
जामखेड २७७ १०१
श्रीगोंदा २६२ २११
बेलवंडी १५३ १५३
पारनेर ४१२ १११
---------------------------
एकूण ५,५५५ १,९३८