दूध उत्पादक शेतकी संघर्ष समिती, किसान सभा व इतर समविचारी शेतकरी संघटनांनी विविध मागण्यांसाठी राज्यभर आंदोलन सुरू केले आहे. या पार्श्वभूमीवर मंगळापूर गावात दगडाला दुधाचा अभिषेक घालत आंदोलन करण्यात आले. ॲड. दीपक वाळे, सोमनाथ भोकनळ, भानुदास गोरे, रमेश पवार, समीर वाळे, शिवाजी वाळे, राधू भोकनळ, नवनाथ भोकनळ, रावसाहेब वाळे, सोमेश्वर भोकनळ, भाऊसाहेब वाळे, योगेश भोकनळ, रामदास घुले, शुभम वाळे, गेणू पवार, भानू भोकनळ, मच्छिंद्र पवार, चंद्रभान भोकनळ, नामदेव पवार आदी या आंदोलनात सहभागी झाले होते.
लॉकडाऊनचा गैरफायदा घेत दूध उत्पादक शेतकऱ्यांची सहकारी व खासगी दूध संघांकडून लूटमार करण्यात आली. लॉकडाऊन काळात मागणी घटल्याचे कारण देत दूध संघांनी दूध खरेदीचे दर १० ते १५ रुपये प्रति लिटरने पाडले; मात्र ग्राहकांसाठी विक्रीदर तसेच ठेवत शेतकरी व ग्राहकांची प्रचंड लूटमार केली आहे. ज्या दूध संघांनी दूध खरेदीचे दर पाडले, त्या सर्व दूध संघाचे ऑडिट करा. प्रत्यक्षात दुधाची मागणी किती घटली होती व त्या प्रमाणात किती दर कमी देण्यात आला. याबाबत सखोल चौकशी करावी. परिस्थितीचा गैरफायदा घेऊन शेतकऱ्यांची लूटमार करणाऱ्या दूध संघावर कठोर कारवाई करावी. साखर व्यवसायाप्रमाणेच दूध व्यवसायाला किमान आधारभावासाठी एफआरपी व शिल्लक मिळकतीत हक्काच्या वाट्यासाठी रेव्हेन्यू शेअरींग असे कायदेशीर दुहेरी संरक्षण करा. आदी मागण्या निवेदनाद्वारे करण्यात आल्या आहेत.
फोटो नेम : १७० मंगळापूर आंदोलन, ओळ : संगमनेर तालुक्यातील मंगळापूर गावात दगडाला दुधाचा अभिषेक