यावेळी भरोसा सेलच्या प्रमुख तथा पोलीस निरीक्षक पल्लवी उबरहंडे यांनी पोलीस मित्र संघटनेच्या अध्यक्षा शारदा हाेशिंगे व त्यांच्या सहकाऱ्यांना सेलमधील कामकाजाची माहिती दिली. त्यानंतर हाेशिंगे व त्यांच्या सहकाऱ्यांनी वेगवेगळ्या कक्षात थांबून तक्रारी घेऊन आलेल्या महिलांच्या अर्जांवर कामकाज केले. यावेळी पीडित महिलांसह त्यांच्या कुटुंबियांच्या अडचणी समजून घेत आपसात वाद मिटवावेत, याबाबत प्रबोधन केले. यावेळी बोलताना पल्लवी उबरहंडे म्हणाल्या, समाजात महिलांसह वृद्ध व्यक्तींवर अन्याय, अत्याचाराच्या घटना घडत असतात. आपण समाजात वावरत असतांना अशा अनेक बाबी आपल्या निदर्शनास येतात. अशावेळी एक सजग नागरिक म्हणून पीडितेला मदत करणे हे आपले कर्तव्य आहे. अन्याय, अत्याचाराच्या बळी ठरत असलेल्या महिलांना एकाच ठिकाणी सर्व कायदेशीर मदत मिळावी, या उद्देशाने भरोसा सेलची स्थापना झालेली आहे. भरोसा सेलच्या माध्यमातून गेल्या तीन ते चार वर्षात अनेकांचे संसार पुन्हा जोडले आहेत. एक कर्तव्यदक्ष नागरिक म्हणून आपणही पीडितांची मदत करावी तसेच महिलांनी अन्याय सहन न करता भरोसा सेलकडे तक्रार करावी अथवा १०९१ या टोलफ्री क्रमांकावर संपर्क करावा, असे आवाहन त्यांनी केले. यावेळी पोलीस हेड कॉन्स्टेबल उमेश इंगवले, राजू वाघ, सादीक शेख, सुमन दिघोळे, पोलीस नाईक स्वाती कुचे, सुलभा अवटी, अनिता विधाते, योगिता साळवे, स्वाती ढवळे, साेनिया पारधे, सोनाली रोहकले, सुनीता पवार आदी उपस्थित होते.
फोटो ०८ भरोसा सेल
ओळी - पोलीस रेझिंग डे निमित्त भरोसा सेल पोलीस मित्र संघटनेच्या सदस्यांनी एक दिवसाचे कामकाज पाहिले. यावेळी सेलच्या प्रमुख पल्लवी उबरहंडे यांनी उपस्थितांचे स्वागत केले.