अहमदनगर: दुचाकी चालविताना पाठीमागून येणारी वाहने दिसावीत तसेच रस्ता ओलांडताना वळून पाहण्याची गरज भासू नये यासाठी दुचाकीला दोन आरसे दिलेली असतात. बहुतांशी जण मात्र या आरशांचा उपयोग केवळ केस विंचरण्यासाठीच करत असल्याचे निदर्शनास आले आहे. त्यामुळे रस्तेअपघाताला इतर कारणांसह हेही एक कारण आहे. वाहतूक नियमानुसार मोटारसायकल प्रकारातील दुचाकीला दोन आरसे लावणे बंधनकारक आहे. यामुळे रस्त्यावरून चालताना मागील बाजूने उजवीकडून व डावीकडून येणारी वाहने दिसतात. या दोन्ही आरशांचा उपयोग केला तर अपघाताची शक्यता कमी असते. बहुतांशी जण विशषेत: तरुण केवळ फॅशन करायची म्हणून दुचाकीचे दोन्ही आरसे काढून टाकतात. काही जण एकच आरसा ठेवत आहेत. ज्यांच्या दुचाकीला आरसा आहे तेही उपयोग करताना दिसत नाहीत. रस्त्यावरून चालताना मागे वळून पाहतात आणि याचवेळी घडत असल्याचे वाहतूक विभागातील काही कर्मचाऱ्यांंनी सांगितले. विशेष म्हणजे आरसा न वापरणाऱ्या दुचाकीचालकांवर पोलीस कारवाई करताना दिसत नाहीत.
दुचाकीचालकांना हे बंधनकारक आहे
दुचाकीला दोन आरसे असावेत तसेच चालकाकडे वाहन परवाना, कागदपत्रे, हेल्मेट, पोलूशनफ्री सर्टिफिकेट असावे तसेच वाहन क्रमांक व्यवस्थित वाचता येईल असा लिहिलेला असावा. बहुतांशी दुचाकी चालक या नियमांचे पालन करताना दिसत नाही. अशावेळी दंडात्मक कारवाईची तरतूद आहे.
बाईक फॅशन धोक्याची
कॉलेज तरुणांमध्ये असलेली बाईक फॅशनची क्रेझ लक्षात घेत बहुतांशी कंपन्यांनी मॉडर्न आणि स्टायलिश बाईक बाजारात आणल्या आहेत. अनेक तरुण या बाईकलाही आणखी मॉडिफाई करून घेतात. यामध्ये प्रथम आरसा काढला जातो. गर्दीतून सुसाट बाईक चालविणे या तरुणांना थ्रील वाटते. अशावेळी अपघात होण्याची जास्त शक्यता असते.
नियमानुसार दुचाकीला आरसा वापरणे बंधनकारक आहे तसेच सुरक्षिततेच्या दृष्टीनेही हे गरजेचे आहे. आरसा नसेल तर २०० रुपये दंडाची तरतूद आहे. बहुतांशी दुचाकीचालक मात्र आरसा वापरत नाहीत. येणाऱ्या काळात आरसा नसणे अथवा इतर नियमांचे उल्लंघन करणाऱ्या दुचाकी चालकांवर दंडात्मक कारवाई केली जाईल.
- विकास देवरे, वाहतूक निरीक्षक अमदनगर शहर