अहमदनगर : श्रीमंतांना जाळ्यात ओढून त्यांना 'हनीट्रॅप'मध्ये अडकविणारी जखणगाव येथील महिला व तिच्या साथीदाराचा पोलिसांनी पर्दाफाश केल्यानंतर या गुन्ह्याची अणखी व्यापकता वाढणार आहे. सदर महिलेने अनेकांना हनीट्रॅपमध्ये अडकविल्याची जखणगाव परिसरात चर्चा आहे.
दरम्यान पोलिसांनी शनिवारी अटक केलेली महिला व त्याचा साथीदार अमोल सुरेश मोरे यांना न्यायालयाने २० मेपर्यंत पोलीस कोठडीत ठेवण्याचे आदेश दिले आहेत.
गेल्या पाच ते सहा वर्षांपासून सदर महिला श्रीमंत लोकांना हेरून त्यांना शरीर संबंधाचे आमिष दाखवून त्याचे व्हिडिओ चित्रीकरण करत ब्लॅकमेल करत होती. सदर महिलेने तिच्या साथीदाराच्या मदतीने अनेकांचे अश्लील व्हिडिओ चित्रीकरण करत त्यांच्याकडून मोठ्या रकमा उकळल्याची चर्चा आहे. पोलिसांनीही त्या दृष्टीने तपास सुरू केला आहे. ज्यांची अशा पद्धतीने फसवणूक झाली आहे त्यांनी तक्रारीसाठी पुढे, यावे असे आवाहन पोलिसांनी केले आहे. नवऱ्यापासून वेगळी राहणाऱ्या ३० वर्षीय महिलेचा जखणगाव येथे आलिशान बंगला आहे. काही दिवसांपूर्वी तिने मोठा बागायतदार आणि व्यावसायिक असलेल्या व्यक्तीला आपल्या जाळ्यात ओढले. एप्रिल महिन्यात बंगल्यात बोलावून त्याला शरीर संबंध करण्यास भाग पाडले. यावेळी व्हिडिओ चित्रीकरण करत त्या व्यावसायिकाकडे तब्बल एक कोटीची खंडणी मागितली. तसेच त्याला मारहाण करून त्याच्याकडील पैसे व दागिनेही लुटले. महिलेचा त्रास असह्य झाल्याने शेवटी तो व्यावसायिक नगर तालुका पोलिसांकडे गेला आणि आपबिती सांगितली. त्यानंतर पोलिसांनी सदर महिला व तिचा साथीदार अमोल मोरे याला अटक केली.
.........