अहमदनगर : नगरपालिकांच्या निवडणुकांचे पडघम वाजू लागले असून, एक वार्ड एक प्रतिनिधी हाच निर्णय सरकारने कायम ठेवावा, अशा मागणीचे निवेदन विणकर विकास मंडळाचे निमंत्रक हिरालाल पगडाल यांनी मुख्यमंत्री उद्धव ठाकरे यांना सोमवारी पाठविले आहे.
विणकर विकास मंडळाचे निमंत्रक पगडाल यांनी दिलेल्या निवेदनात म्हटले आहे, की राज्य निवडणूक आयोगाने वार्डांची प्रारूप रचना करण्याचा आदेश दिला आहे. ही प्रारूप रचना करताना शासनाने ‘एक वार्ड, एक प्रतिनिधी’ आणि निवडून आलेल्या नगरसेवकांतून नगराध्यक्ष निवडण्याचा निर्णय घेतला होता. परंतु, काही वर्चस्ववादी शक्ती हा निर्णय बदलण्यासाठी सरकारवर दबाव आणत आहेत. जितके वार्ड लहान तितके ते छोट्या -छोट्या समूहांना निवडून येण्यास पोषक असतात. ‘एक वार्ड, एक प्रतिनिधी’ या सुत्रामुळे अठरापगड जाती, बाराबलुतेदार, आलुतेदार, छोट्या कारागीर जाती, भटक्या जाती, व्यापारी जाती यांना निवडून येण्याची अधिक संधी असते. वार्ड ऐवजी प्रभाग केल्यानंतर मतदार संख्या वाढते. त्यामुळे छोट्या छोट्या जाती समूहाचे राजकीय खच्चीकरण होते. धनदांडगे, अधिक लोकसंख्या असलेले जाती समूह यांचे फावते. त्यामुळे मोठे प्रभाग आणि त्यातून एकापेक्षा अधिक प्रतिनिधी निवडण्यास आमचा विरोध आहे. नगरसेवकांतून नगराध्यक्ष निवडल्यामुळे छोट्या वार्डांतून निवडून आलेल्या नगरसेवकाला देखील नगराध्यक्ष होण्याची संधी मिळते. सामान्य जनतेतून नगराध्यक्ष निवडणे म्हणजे अठरापगडजाती, बाराबलुतेदार, आलुतेदार, कारागीर जाती, भटक्या जाती, व्यापारी जाती यांना नगराध्यक्ष होण्याची संधी नाकारणे होय. आम्ही आपणास विनंती करतो की, ज्यांच्याकडे सत्ता, संपत्ती आणि प्रतिष्ठा यांचे केंद्रीकरण झाले आहे. त्यांच्या दबावाखाली येऊन राज्य शासनाने आपला निर्णय बदलू नये. ‘एक वार्ड, एक प्रतिनिधी ’ हाच निर्णय कायम ठेवावा ही आमची आग्रहाची विनंती आहे.