पिंपळगाव माळवी (जि. अहमदनगर) : नगर तालुक्यातील पिंपळगाव माळवी येथील विविध कार्यकारी सोसायटीमार्फत चालविल्या जाणाऱ्या स्वस्त धान्य दुकानामध्ये वाटपासाठी आणलेल्या गहू, तांदूळ, साखर अशा साडेतीन लाख रूपयांच्या धान्याचा अपहार केल्याप्रकरणी एमआयडीसी पोलीस ठाण्यात गुन्हा दाखल झाला आहे.
पिंपळगाव माळवी येथे विविध कार्यकारी सोसायटीमार्फत स्वस्त धान्य दुकान चालविले जाते. या दुकानाची जिल्हा पुरवठा अधिकारी यांनी २६ मार्च २०२१ रोजी तपासणी केली होती. त्यावेळी धान्य दुकानामध्ये कमी-अधिक प्रमाणात तफावत दिसून आली होती. त्यांनी याबाबत सोसायटीचे अध्यक्षांना नोटीस देऊन खुलासा मागविला होता. त्या अन्वये पुन्हा २० जुलै २०२१ राेजी पुरवठा निरीक्षक अहमदनगर यांनी स्वस्त धान्य दुकानातील धान्य साठा तपासला. त्यावेळी दुकानाच्या सेल्समनने ३ लाख ५६ हजार ४५४ रूपये किमतीचे गहू, तांदूळ, साखर, चना डाळ, मका, अख्खा चणा असे स्वस्त धान्य स्वत:च्या फायद्यासाठी गरजू लाभार्थ्यांना धान्य वाटप न करता कोठेतरी विक्री करून शासनाची फसवणूक केल्याचे निष्पन्न झाले.
याप्रकरणी पुरवठा निरीक्षक महादेव कुंभार यांच्या फिर्यादीवरून स्वस्त धान्य दुकानाचा सेल्समन भाऊसाहेब भीमराव शिंदे (रा. पिंपळगाव माळवी) याच्यावर जीवनावश्यक वस्तू अधिनियम १९५५ चे कलम ३ व ७ प्रमाणे गुन्हा दाखल करण्यात आला आहे. याप्रकरणी अधिक तपास पोलीस उपनिरीक्षक सदाशिव कणसे करत आहेत.
-----
पिंपळगाव माळवी येथील स्वस्त धान्य दुकानातील धान्य साठ्यामध्ये तफावत आढळली. या प्रकरणी अपहाराचा गुन्हा दाखल करून दुकान सील केले आहे. परंतु, गरजू नागरिकांना पर्यायी व्यवस्था करून धान्य वाटप लवकरच केले जाईल.
-उमेश पाटील, तहसीलदार, नगर
220721\img_20210722_155454.jpg
पिंपळगाव माळवी येथील सेवा सोसायटीमार्फत चालविले जाणारे स्वस्त धान्य दुकान हा अपहार प्रकरणी तहसीलदारांनी सील केले आहे.