छत्रपती स्टेडियमवर लाखो मावळे

अहमदनगर : सकाळच्या पहिल्या प्रहरीच मराठा मावळ्यांचे जत्थेच्या -जत्थे छत्रपती शिवाजी महाराज स्टेडियम (वाडियापार्क) मैदानावर दाखल होत होते़ एका रांगेत आणि कोणतीही घोषणा न देता आलेल्या मोर्चकऱ्यांनी भिंतीवरील पायऱ्यांवर बसकन मांडले़ काही वेळानंतर तिथेही पाय ठेवायला जागा राहिली नाही़ रात्री पाऊस होऊन गेल्याने मैदानात चिखल झाला होता़ त्याची तमा न बाळगता मोर्चेकरी हातात उंच भगवे झेंडे घेवून चिखलात उभे राहिले़ हजारो मराठ्यांचा असलेला हा नि:शब्द हुंकार पाहता पाहता लाखोंच्या घरात पोहोचला़ जिकडे नजर टाकावी, तिकडे भगवे व काळे झेंडे़ मैदानावर जणू काही भगवा सागरच उसळला असल्याचे चित्र शुक्रवारी वाडियापार्क मैदानावर पाहायला मिळाले़मोर्चात सहभागी होण्यासाठी जिल्हाभरातून गुरुवारी रात्रीच मराठा समाज बांधव शहरात दाखल झाले होते़ स्टेडियममध्ये मोर्चेकऱ्यांची सकाळपासूनच रीघ लागली होती़ विशेष म्हणजे मोर्चात कोणतीही घोषणा दिली जात नव्हती़ एकाही नेत्याचे नेतृत्व नाही़ नेतृत्व नसलेले मोर्चेकरी रांगेने येऊन मैदानाच्या पायऱ्यांवर बसले़ सकाळी आठ वाजेच्या सुमारास काही हजार मराठे मैदानावर दाखल झाले होते़ ही संख्या दहा वाजेनंतर वाढत गेली़ मैदानात स्वयंसेवकांनी लांबपर्यंत मानवी साखळी केली होती़ महिला व तरुणी उजव्या बाजूला बसल्या होत्या़ हातात काळे व भगवे झेंडे घेवून तरुणी मोर्चात सहभागी होण्यासाठी जमल्या होत्या़ शाळकरी मुलींचाही यात सहभाग होता़ मैदानातील गर्दी वाढून दहा वाजता मैदान मोर्चेकऱ्यांनी भरून गेले़ सर्वत्र काळे व भगवे झेंडे दिसत होते़ रात्री नगर शहरात पाऊस झाला होता़ त्यामुळे मैदानात कमालीचा चिखल होता़ मोर्चेकरी चिखलात हातात झेंडे घेवून उभे राहिले़ अकरा वाजेनंतर गर्दी अजूनच वाढली़ मैदानात पाय ठेवायला जागा उरली नाही़ मोर्चेकऱ्यांना प्रवेशव्दारावर पाण्याचे पाऊचचे वाटप करण्यात आले़ नियोजित वेळेप्रमाणे मोर्चेकऱ्यांना बाहेर सोडण्य्ाांत आले़ स्वयंसेवकांनी मानवी साखळी तयार करून महिलांना मार्ग मोकळा करून दिला़ अत्यंत शिस्तबध्द पध्दतीने महिला व युवती मोर्चास्थळाकडे रवाना झाल्या़ काळ्या साड्या परिधान केलेल्या लाखो महिला मोर्चास्थानाकडे रवाना झाल्या़ कोपर्डीची घटना नगर जिल्ह्यातील असल्याने पीडित मुलीच्या वडिलांसह ग्रामस्थ मोठ्या संख्येने मोर्चात सहभागी झाले होते़ उपंस्थित मोर्चेकऱ्यांना संयोजकांकडून सूचना देण्यात येत होत्या़ या सूचनांचे पालन करत मोर्चेकऱ्यांनी शिस्तीचे दर्शन घडविले़नेटवर्क गायबमैदानावर लाखो मोर्चेकरी एकत्र आले़ फोटो घेवून ते गु्रपवर टाकले जात होते़ मात्र मोबाईलला नेटवर्क मिळत नव्हते़ उंचावर जावूनही नेटवर्क मिळत नसल्यामुळे अनेकांचा भ्रमनिरास झाला़ महिलांचा सहभाग लक्षणीयमराठा क्रांती महा मूक मोर्चात सहभागी होण्यासाठी लाखोंच्या संख्येने महिला शहरात सकाळीच दाखल झाल्या़ वाडियापार्क येथे महिला मोठ्या संख्येने जमल्या़ महिला व युवतींनी हातात काळे व भगवे झेंडे घेतले होते़ काहींनी प्रसार माध्यमांना प्रतिक्रिया देताना संताप व्यक्त केला़ महिला लोकप्रतिनिधींसह विविध संघटनांच्या महिला पदाधिकाऱ्यांचीही संख्या मोठी होती़ चिमुकल्यांसह माता भगिनी मोर्चात सहभागी झाल्या होत्या़ महिलांचा सहभाग लक्षणीय होता़पाण्याचे पाऊच४मोर्चेकऱ्यांना पाण्याचे पाऊचचे वाटप करण्यात आले़ मोर्चेकरी भल्या पहाटेच शहरात दाखल झाले होते़ पिण्याच्या पाण्याची ठिकठिकाणी सोय करण्यात आली होती़ तसेच संयोजन समितीने पाण्याचे पाऊचचे वाटप केले़ जागेवरच पाणी मिळाल्याने मोर्चेकऱ्यांनी समाधान व्यक्त केले़ मोर्चेकऱ्यांसोबत सेल्फी४मोर्चेकऱ्यांच्या हाती असलेल्या भगव्या झेंड्यांमुळे मैदान भगवेमय झाले होते़ उंच झेंडे घेवून मोर्चात सहभागी झालेल्या मोर्चेकऱ्यांसोबत सेल्फी घेण्याची धावपळ सुरू होती़ काहींनी उंच भगवे झेंडे हातात घेवून सेल्फी घेतले व व्हॉटसअप ग्रुपवर सेंन्ड केले़ हे फोटो हजारो ग्रुपवर व्हायरल झाले़