कर्जत : दारूविक्रीचा व्यवसाय सोडून एखाद्याने चक्क चहा विक्रीचाच व्यवसाय सुरू केला तर कुणालाही नवल वाटणारच. हा बदल करून दाखविला आहे कर्जतचे पोलीस निरीक्षक चंद्रशेखर यादव यांनी.
पोलीस निरीक्षक पदाचा कार्यभार हाती घेतल्यापासून अवैध धंद्यांवर नियंत्रण आणण्याचा त्यांचा प्रयत्न सुरू आहे. त्यामुळे कारवाया करत असताना ते अनेकांची मने वळविण्याचा प्रयत्न करत आहेत. अवैध व्यवसायामुळे समाजात आपली प्रतिमा मालिन होते. मान-सन्मान मिळत नाही. त्यामुळे सन्मानजनक व्यवसाय करून आपण जबाबदार नागरिक आहोत, अशी ओळख निर्माण करून द्यावी, असे प्रत्येकवेळी अवैध व्यावसायिकांना ते मार्गदर्शन करतात. प्रसंगी त्यांनी अनेकांवर मोठ्या कारवायाही केल्या.
कर्जत शहरातील बाळासाहेब माने हे अवैध दारूविक्री करत होते. त्यामुळे त्यांच्यावर यापूर्वी वारंवार कारवाया करण्यात आल्या होत्या. पोलीस निरीक्षक चंद्रशेखर यादव यांनी माने यांना पोलीस ठाण्यात बोलावून ‘तुम्ही अवैध धंदे करू नका’ अशी वेळोवेळी समज दिली. चांगला व सन्मानजनक व्यवसाय करा, मी आवश्यकतेप्रमाणे तुम्हाला मदत करेल, असे वेळोवेळी त्यांना सांगून जबाबदार नागरिकाची भावना पटवून दिली. त्यांची ही तळमळ दारूविक्री व्यवसाय करणारे बाळासाहेब माने यांचे मनपरिवर्तन करणारी ठरली. त्यांनी भांडेवाडी येथे करमाळा रस्त्यालगत श्री साई कृपा नावाने चहाचे हॉटेल सुरू केले. यादव एवढ्यावरच थांबले नाहीत. ते माने यांच्या हॉटेलवर गेले. तेथे चहाची चव चाखत नवीन व्यवसायासाठी शुभेच्छाही दिल्या. यावेळी सहायक पोलीस निरीक्षक सुरेश माने उपस्थित होते.
---
साहेब, आता अवैध धंदा करणार नाही
साहेब, आता पुढील काळात कसलाही अवैध व्यवसाय करणार नाही, असा शब्द देतो. दारूविक्रीचा व्यवसाय सोडून चक्क चहा विकणाऱ्या या नवख्या व्यावसायिकाच्या या शब्दाने चंद्रशेखर यादवही भारावले.
---
३० कर्जत चहा
कर्जत-करमाळा रस्त्यालगत बाळासाहेब माने याने सुरू केलेल्या हॉटेलमध्ये चहाचा आस्वाद घेताना पोलीस निरीक्षक चंद्रशेखर यादव व इतर.