पळवे : नगर-पुणे महामार्गावर पारनेर तालुक्यातील म्हसणे फाटा टोलनाक्यासह जातेगाव घाटात वाहने अडवून प्रवाशांना लुटणाऱ्या पाच जणांना वेगवेगळ्या कारवाईत सुपा पोलिसांनी अटक केली.
शुक्रवारी दुपारी चार वाजता सुपा पोलीस गुन्ह्याच्या तपासासाठी नगर-पुणे महामार्गावरून जात होते. त्यावेळी दोन मोटारसायकल पुण्याच्या दिशेने चालल्या होत्या. त्यातील दोन्ही दुचाकीवर तिघे बसलेले होते. त्यांच्या हालचाली पाहून पोलिसांचा संशय बळावला. त्यामुळे पोलीस निरीक्षक नितीनकुमार गोकावे यांनी दोन्ही दुचाकी थांबविण्यास सांगितले. त्यानुसार पोलीस उपनिरीक्षक चंद्रकांत कोसे, पोलीस कॉन्स्टेबल ठोंबरे, पोलीस हेडकॉन्स्टेबल पटेल, खैरे यांनी त्यांना थांबवून चौकशी सुरू केली. यावेळी नयन राजेंद्र तांदळे (वय २६, रा. भिस्तबाग चौक, अहमदनगर) याची अंगझडती घेतली असता त्याच्याकडे एक चाकू आढळून आला. तीन हजारांची रोकड व आधारकार्ड मिळून आले. त्याच्याबरोबर असलेल्या विठ्ठल भाऊराव साळवे (रा. झापवाडी, ता. नेवासा) याचीही अंगझडती घेतली. त्याच्या खिशात दीड हजारांची रोकड, एक मिरची पूड आढळून आली. तिसऱ्या व्यक्तीचे नाव अक्षय बाबासाहेब ठोंबरे (रा. सावेडी) असून त्याच्या खिशातही मिरची पूड मिळून आली.
दरम्यान, दुसऱ्या दुचाकीवरील एक जण पळून गेला. त्या दुचाकीवरील शाहुल अशोक पवार (वय ३१), अमोल छगन पोटे (वय २८, दोघे रा. सुपा, ता.पारनेर) यांच्या पँटच्या खिशातही मिरची पूड आढळून आली. त्यातील शाहुल पवार याच्याकडे एक सुराही आढळून आला. या पाचही जणांना पारनेर येथील न्यायालयात हजर करण्यात आले असता न्यायालयाने त्यांना पाच दिवस पोलीस कोठडीत ठेवण्याचे आदेश दिले.
फोटो ओळी २६ पळवे
रस्ता लूट करणाऱ्या पाच जणांसह सुपा पोलीस ठाण्याचे अधिकारी, कर्मचारी.