अकोले : तालुक्यातील आदिवासी गावांमध्ये सुरू असलेल्या गावरान बियाणे संवर्धन व वृद्धी प्रकल्पाला राज्याचे कृषी उपायुक्त विनयकुमार आवटे यांनी भेट देऊन पाहणी केली. पद्मश्री राहीबाई पोपेरे यांच्या गावरान बियाणे बँकेची पाहणी केल्यानंतर ममता भांगरे यांच्या घरी नागलीच्या भाकरीचाही अधिकाऱ्यांनी आस्वाद घेतला.
अकोले तालुक्यातील गावरान बियाणे संवर्धन प्रकल्पांना भेट देऊन उपायुक्त आवटे यांनी या प्रकल्पांच्या विकासासंदर्भात सूचना केल्या. यावेळी तालुका कृषी अधिकारी प्रवीण गोसावी, त्र्यंबकेश्वरचे तालुका कृषी अधिकारी आनंद कांबळे, कृषी पर्यवेक्षक सुरेश पोखरकर, दीपा मोरे, बायफचे राज्य समन्वयक सुधीर वागळे, कृषी शास्त्रज्ञ डॉ. विठ्ठल कौठाळे, संजय पाटील, बायफ नाशिक विभागीय अधिकारी जितीन साठे, विठ्ठल सोनवणे आदींची उपस्थिती होती.
पोपेरे यांच्या गावरान बियाणे बँकेला आवटे यांनी भेट देऊन कळसूबाई परिसर स्थानिक बियाणे संवर्धन सामाजिक संस्थेच्या सदस्यांसोबत चर्चा केली. शबरी महामंडळ नाशिक यांच्या अर्थसाहाय्याने गावरान बियाणे संवर्धन व मूल्यवर्धन प्रकल्प सुरू आहे. कोंभाळणे येथे विविध पिकांच्या वाणांचे प्रदर्शन मांडण्यात आले होते. आवटे यांनी या प्रदर्शनाला भेट देत बायफचे तज्ज्ञ मार्गदर्शक संजय पाटील व बीजमाता पोपेरे यांच्याकडून गावरान बियाणांची माहिती घेतली. त्यानंतर एकदरे येथील भाताच्या बीज बँकेला त्यांनी भेट दिली. या ठिकाणी हैबत भांगरे व हिराबाई भांगरे यांच्याकडून गावरान बीज संवर्धनाबद्दल माहिती घेतली. फूड मदर ममताबाई भांगरे यांच्या शेताला भेट देऊन रबी हंगामात पेरणी केलेल्या विविध गावरान वाणांची पाहणी केली. हंगामी व बहुवर्षायू परसबागेची पाहणी करून त्यातील बारकावे जाणून घेतले. वाकी येथे अकोले तालुका महिला शेतकरी उत्पादक कंपनीचे विविध उपक्रम त्यांनी पाहिले. ममताबाई भांगरे यांनी केलेल्या नागलीच्या भाकरी आणि वालाच्या शेंगांच्या आमटीचाही अधिकाऱ्यांनी पाहुणचार घेतला.
फोटो आहे