मिरवणूक द्वारकामाई मंदिरात आल्यानंतर तेथे श्रीसाईसच्चरित ग्रंथाचा प्रथमाध्याय वाचून बगाटे यांनी पारायणाचा शुभारंभ केला. यानंतर डेप्युटी सीईओ रवींद्र ठाकरे, मुख्यलेखाधिकारी बाबासाहेब घोरपडे, कार्यकारी अभियंता संजय जोरी व संरक्षणप्रमुख अण्णासाहेब परदेशी यांनी अनुक्रमे दोन ते पाच अध्यायांचे वाचन केले. उत्सवानिमित्त सकाळी सीईओ कान्हुराज बगाटे व संगीता बगाटे यांच्या हस्ते समाधी मंदिरात पाद्यपूजा करण्यात आली. दुपारी माध्यान्ह आरती, तर सायंकाळी चार ते सहा वाजेदरम्यान मंदिर कर्मचारी संभाजी तुरकणे यांचे कीर्तन झाले. रात्री समाधी मंदिरात शेजारती झाली. द्वारकामाई मंदिर मात्र पारायणासाठी आतील बाजूने रात्रभर खुले ठेवण्यात आले. उत्सवाच्या प्रथमदिनी होणारा पालखी सोहळा व मुख्यदिनी शुक्रवारी रात्री होणारी रथ मिरवणूक कोरोनामुळे रद्द करण्यात आली आहे.
यंदाच्या उत्सवात अमेरिका येथील साईभक्त शुभा पाई यांच्या देणगीतून मंदिर व परिसरात फुलांची आकर्षक सजावट व सुनील बाराहाते, साई समर्थ इलेक्ट्रिकल, शिर्डी यांनी मंदिर व परिसरात आकर्षक विद्युत रोषणाई केली. शुक्रवारी उत्सवाच्या मुख्य दिवशी काकड आरतीनंतर द्वारकामाईतील अखंड पारायणाची सांगता होऊन प्रतिमा व साईसच्चरित ग्रंथाची मिरवणूक काढण्यात येईल. दुपारी माध्यान्ह, सायंकाळी धुपारती, तर रात्री शेजारती होईल. दुपारी मंदिरात कीर्तनाचा कार्यक्रम होईल.
.................
भाविकांनी घेतले कळसाचे दर्शन
कोरोनामुळे गुरू पौर्णिमा उत्सव भक्तांविना साजरा झाला. या उत्सवाला दूरवरून आलेल्या शेकडो भाविकांनी कळसाचे दर्शन घेऊन हजेरी लावली.