संगमनेर : काँग्रेस पक्षाचे शिर्डीचे शहराध्यक्ष सचिन चौगुले आणि माजी नगरसेवक सुरेश आरणे यांच्यावर मंगळवारी (दि.०२) संध्याकाळी लोणी येथे प्राणघातक हल्ला करण्यात आला. अज्ञात दहा-बारा जणांनी त्यांच्यावर केलेल्या हल्ल्यात मारहाण करताना गज, हॉकी स्टिक, चॉपरचा वापर केला. त्या दोघांनाही उपचारासाठी संगमनेरातील मेडिकव्हर हॉस्पिटल येथे आणण्यात आले, तेथे त्यांच्यावर उपचार सुरू असून रात्री उशिरा काँग्रेस विधिमंडळपक्षनेते, आमदार बाळासाहेब थोरात, माजी आमदार डॉ. सुधीर तांबे यांनी त्यांची भेट घेऊन विचारपूस केली.
राष्ट्रवादी काँग्रेस पक्षाचे संस्थापक अध्यक्ष शरद पवार हे एका कार्यक्रमानिमित्त संगमनेर तालुक्यातील आश्वी बुद्रूक येथे आले होते. त्या कार्यक्रमासाठी शहराध्यक्ष चौगुले, माजी नगरसेवक आरणे हे उपस्थित होते. कार्यक्रम संपल्यानंतर ते त्यांच्या कारमधून शिर्डी येथे जात होते. ते लोणी येथे पोहोचले असता पाच-सहा दुचाकींवरून आणि कारमधून आलेल्या अज्ञात दहा-बारा जणांनी चौगुले यांच्या कारची तोडफोड करण्यास सुरूवात केली. चौगुले यांच्यासह माजी नगरसेवक आरणे यांना कारच्या खाली ओढून दोघांना बेदम मारहाण करण्यात आली. त्यांना उपचारांसाठी तातडीने संगमनेरातील मेडिकव्हर हॉस्पिटल येथे आणण्यात आले. तेथे त्यांच्यावर उपचार सुरू आहेत.