शहर विभागाचे पोलीस उपअधीक्षक विशाल ढुमे यांनी बुधवारी केडगाव येथे भेट देऊन आरोपींचा शोध घेऊन त्यांना अटक करण्याचे आदेश कोतवाली पोलिसांना दिले आहेत.
मंगळवारी सकाळी केडगाव येथील शास्त्रीनगर येथे चौघांनी घरात घुसून पत्रकार तांबडे यांच्यासह त्यांच्या कुटुंबाला मारहाण केली. या प्रकरणी कोतवाली पोलीस ठाण्यात अभिजीत आजिनाथ तांबडे यांनी दिलेल्या फिर्यादीवरून मच्छिंद्र घोगरे, तुषार मच्छिंद्र घोगरे, राहुल ससाणे व विकास कोतकर (रा. सर्व शास्त्रीनगर केडगाव) यांच्या विरोधात गुन्हा दाखल करण्यात आला आहे. अभिजीत तांबडे हे मंगळवारी सकाळी त्यांच्या घरी असताना आरोपींनी तेथे येऊन अभिजीत यांना मारहाण करण्यास सुरुवात केली. यावेळी अभिजीत यांचे आई, वडील व चुलते पत्रकार मुरलीधर तांबडे हे मध्ये आले असता आरोपींनी त्यांनाही शिवीगाळ करून मारहाण केली. यावेळी मच्छिंद्र घोगरे याने अभिजीत यांची आई सुनीता यांच्या पोटात चुलीमधील जळके लाकूड मारल्याने त्यांना जखम झाली आहे. या मारहाणीचा सर्व पत्रकारांनी निषेध करत आरोपींना त्वरित अटक करून कडक कारवाई करावी, अशी मागणी पोलिसांकडे केली आहे.