मतमोजणीसाठी प्रशासन सज्ज

 अहमदनगर : लोकसभा निवडणुकीची मतमोजणी शुक्रवारी (दि.१६) होत आहे. या मतमोजणीसाठी जिल्हा प्रशासनाने जय्यत तयारी केली आहे. यासाठी कडेकोट बंदोबस्तही लावला आहे. एमआयडीसीतील वखार महामंडळाच्या गोदामात ही मतमोजणी होईल. प्रत्येक फेरीनंतर निवडणूक आयोगाला त्याची माहिती दिली जाईल, अशी माहिती जिल्हाधिकारी अनिल कवडे यांनी दिली. मतमोजणीच्या तयारीसाठी जिल्हाधिकारी कार्यालयात पत्रकार परिषद घेण्यात आली. त्यावेळी जिल्हाधिकारी कवडे बोलत होते. यावेळी अतिरिक्ति जिल्हाधिकारी रवींद्र जगताप, पोलीस अधीक्षक रावसाहेब शिंदे व निवडणूक शाखेचे उपजिल्हाधिकारी सुनील माळी आदी उपस्थित होते. मतमोजणी ही प्रत्येक विधानसभा मतदारसंघनिहाय होईल. ईव्हीएम मतमोजणीसाठी १४ टेबल लावले जातील. पोस्टल बॅलेटच्या मोजणीसाठी स्वतंत्र रचना आहे. त्यात ५०० मतपत्रिकांसाठी १ टेबल लावला जाईल. नगरसाठी ४ तर शिर्डीसाठी ३ टेबल लावले आहेत. प्रत्येक उमेदवारास पोस्टल बॅलेटच्या १ टेबलासाठी १ प्रतिनिधी नियुक्त करता येईल. नगरसाठी १ हजार ८७६ तर शिर्डीसाठी ६९७ मते पोस्टाद्वारे आली आहेत. मतमोजणीस १८ वर्षे पूर्ण झालेल्या व्यक्तीसच प्रतिनिधी नेमता येईल. प्रत्येक टेबलसाठी १ पर्यवेक्षक, १ सहायक, १ सूक्ष्म निरीक्षक व शिपाई अशी व्यवस्था आहे. इतर दोन सूक्ष्म निरीक्षक सर्व प्रक्रियेवर लक्ष ठेवून असतील. केंद्रीय निरीक्षकही उपस्थित राहतील. मतमोजणीस नियुक्त केलेल्या प्रतिनिधींना ओळखपत्र दिले आहेत. त्यांनी त्यावर स्वाक्षरी करावी. त्यांना टेबल सोडून इतरत्र फिरण्यास मनाई केली आहे. त्यांना सकाळी ७ वाजता मतमोजणी केंद्रावर उपस्थित राहावे लागेल. (प्रतिनिधी) मोबाईलला बंदी मतमोजणी केंद्रात उमेदवार व निवडणूक प्रतिनिधी तसेच गणना प्रतिनिधीला भ्रमणध्वनी नेण्यास बंदी करण्यात आली आहे. कर्मचार्‍यांसाठीही हा नियम आहे. वृत्तपत्रांच्या प्रतिनिधींना मात्र, यातून सवलत देण्यात आली आहे. मीडिया प्रतिनिधींसाठी प्रवेशपत्र दिले आहेत. त्यांच्यासाठी स्वतंत्र कक्षही केला आहे. १०० मीटरच्या आत गाड्या आणण्यास मनाई केली आहे. निवडणूक खर्च मतदान प्रक्रिया पार पडल्यानंतर व निवडणूक निकाल जाहीर होण्यापूर्वीचा निवडणुकीसंबंधातील खर्च उमेदवाराच्या निवडणूक खर्चात समाविष्ट करणे आवश्यक आहे. स्टार कॅम्पेनर-उमेदवारांनी मतदारसंघास भेट दिल्यास (मतमोजणी प्रक्रियेची माहिती घेण्यासाठी) झालेला खर्च ग्राह्य धरला जाईल.