कोपरगाव : अज्ञात व्यक्तींनी रविवारी मध्यरात्रीनंतर शहरातील शारदानगरमध्ये अशोक कचरू टेंबरे यांच्या घराच्या आवारात लावलेल्या ५ दुचाकी रॉकेल टाकुन जाळल्याची घटना घडली. याप्रकरणी शहर पोलिसात गुन्हा दाखल करण्यात आला आहे.शारदानगरमध्ये अशोक टेंबरे यांचा बंगला असून येथेच करणीदान चरण हे भाडेकरू म्हणून राहतात. रविवारी रात्री टेंबरे व चरण हे नियमीतपणे आपल्या दुचाकी बंगल्याच्या आवारात लावून झोपले. दरम्यान मध्यरात्रीनंतर अचानक आग व धुराचे लोळ निघून स्फोट झाल्याचा आवाज आला. त्यामुळे टेंबरे यांनी घराचा दरवाजा उघडून बघितले असता दुचाकी जळत असल्याचे दिसले. आरडाओरड झाल्यावर आसपासच्या नागरिकांनी आग विझविण्याचा प्रयत्न केला. अखेर नगरपालिकेच्या अग्नीशामक दलास पाचारण करून रात्री उशिरा आग आटोक्यात आणण्यात आली. आगीत टेंबरे यांच्या मालकीच्या टिव्हीएस स्टार (क्रमांक एम.एच.१७, एक्स.८४०३), पॅशन प्रो (क्रमांक एम.एच.१७, ए.के.९४३९), स्कुटी (क्रमांक एम.एच.१७, वाय. २७१९), हिरो मोटो (क्रमांक एम.एच.१५, सी.एक्स.५४१७) तर चरण यांच्या मालकीची हिरो पॅशन (क्रमांक एम.एच.१७, व्ही.यु.१७५३) या दुचाकी जळून लाखो रूपयांचे नुकसान झाले आहे. जळीताची माहिती मिळताच शहर पोलिसांनी घटनास्थळी जाऊन पंचनामा केला. याप्रकरणी टेंबरे यांच्या फिर्यादीवरून पोलिसांनी अज्ञात व्यक्तींविरूध्द जळीताचा गुन्हा दाखल केला आहे. पुढील तपास पोलीस निरीक्षक दिलीप पारेकर करीत आहेत.