नेर : तालुक्यात डेंग्यू व मलेरियाने डोके वर काढले आहे. परिसरातील नाले, रिकाम्या जागेत वाढलेले गाजरगवत डोकेदुखी ठरत असून आजारांना निमंत्रण देत आहे.
आरोग्य विभाग नाल्यावर लक्ष केंद्रित करून मॅलेथीयन लिक्विडची फवारणी करत आहे. तालुक्यात आतापर्यंत १० डेंग्यू रुग्णांची नोंद झाली. तर ग्रामीण भागात ५ रुग्णांची नोंद आहे. तसेच खासगी रुग्णालयातही मोठ्या प्रमाणात रुग्ण येत आहे. यात डेंग्यूचे ६०, तर मलेरियाचे ५० रुग्ण असल्याची माहिती वैद्यकीय सूत्रांनी दिली. नगरपरिषदेने नाल्या साफसफाई व कचरा गाड्या नियमित फिरवण्यावर भर दिला असला तरी नबाबपूर परिसर, साईधामनगर परिसर, नबाबपूर ते नेर परिसरातील मिलमिली नदीकडे दुर्लक्ष केले आहे. या नाल्यात मोठ्या प्रमाणात गटार जमा झाले आहे. बेशरम व गाजरगवत वाढले आहे. पाणी तुंबल्याने परिसरात दुर्गंधी पसरली आहे. भाजीबाजार परिसरात साचलेल्या सांडपाण्यात सडलेला भाजीपाला फेकला जातो. मिलमिली नदीतील घानकचराही रोगराई वाढविण्यासाठी कारणीभूत ठरत आहे.
कोट
नेर नगरपरिषद क्षेत्रात नाल्या साफ ठेवण्यासाठी विशेष लक्ष देऊन फवारणी केली जात आहे. आरोग्य विभाग यात हयगय करणार नाही, यावरही लक्ष दिल्या जात आहे.
- पवन जयस्वाल, उपसभापती तथा आरोग्य सभापती, नगरपरिषद, नेर
कोट
नेर नबाबपूर शहरात मलेरिया, डेंग्यूचा कहर वाढू नये यासाठी जनजागृतीसोबत मॅलेथीयन लिक्विडची फवारणी नाल्यावर केली जात आहे. नाल्यावर डासांचा उद्रेक वाढू नये यासाठी धूर फवारणी नियमित केली जाते.
- मनोज कुडमेथे, आरोग्य विभागप्रमुख, नेर