सरनाईक समाजकार्य महाविद्यालयात महिला सक्षमीकरण कार्यशाळा

रासेयो कार्यक्रम अधिकारी प्रा. डॉ. भारती देशमुख यांनी आपल्या प्रास्ताविकेतून विद्यार्थिनींनी दिसण्यापेक्षा असण्यावर भर देऊन आपल्या व्यक्तिमत्त्वाचा विकास करावा, असे विचार व्यक्त केले. महिलांनी स्वतःमधील आत्मविश्वास जागृत करून सामाजिक व आर्थिक दृष्टिकोनातून सक्षम व्हावे, त्याचबरोबर महिलांच्या विकासासाठी असलेल्या शासनाच्या विविध योजनांबाबत माहिती देऊन आधुनिक काळात नवीन आव्हाने पेलण्यासाठी महिलांनी स्वतःला सक्षम करावे, असे विचार कार्यक्रमाच्या प्रमुख मार्गदर्शक डॉ. सुनीता राठोड यांनी व्यक्त केले. कार्यक्रमाच्या अध्यक्ष प्रा. कीर्तने यांनी समाजकार्याच्या विद्यार्थ्यांनी महिला सक्षमीकरणाची सुरुवात आपल्या घरापासून करावी, असे आवाहन केले. कार्यक्रमाचे सूत्रसंचालन शुभम पवार, तर आभारप्रदर्शन रासेयोचे सहकार्यक्रम अधिकारी प्रसेनजित चिखलीकर यांनी केले. ही कार्यशाळा ऑनलाइन पद्धतीने झूम ॲपवर घेण्यात आली. या कार्यशाळेत महाविद्यालयातील प्राध्यापकवृंद तसेच राष्ट्रीय सेवा योजनेच्या विद्यार्थ्यांनी ऑनलाइन सहभाग नोंदविला.