याबाबत वाशिम ग्रामीण पोलिसांकडून मिळालेल्या माहितीनुसार, वाशिमवरून हिंगोलीकडे जात असलेल्या एम.एच. १८ - बी.जी. ११५५ क्रमांकाच्या ट्रकने वाशिम-कनेरगाव मार्गावरील सायखेडा फाट्यानजीक एम.एच. ३८ - एल. २०६८ क्रमांकाच्या दुचाकी वाहनास मागून जबर धडक दिली. या घटनेत वाहनचालक विनोद विश्वनाथ मते हे जागीच ठार झाले; तर त्यांची पत्नी सिंधूबाई यांनाही गंभीर दुखापत झाली. घटनेची माहिती मिळताच ग्रामीण पोलीस स्टेशनच्या चमूने घटनास्थळी दाखल होत पंचनामा केला व मृतदेह शवविच्छेदनासाठी शासकीय रुग्णालयाकडे पाठविण्यात आला.
.....................
सिंधूबाईंचा आक्रोश असह्य करणारा
तपोवन (ता. सेनगाव, जि. हिंगोली) येथून तोंडगावमार्गे उकळीपेन येथे भावाच्या मुलीच्या घरी वास्तुशांतीच्या कार्यक्रमास जात असतानाच विनोद मते यांच्यावर काळाने झडप घातली. या अपघातात मते यांच्या शरीराचे तुकडेतुकडे झाले. त्यांच्या अर्धवट अवस्थेतील मृतदेहाजवळ बसून असलेल्या सिंधूबाई रस्त्यावरून ये-जा करणाऱ्या प्रत्येकाकडे मदतीची याचना करीत होत्या. त्यांचा हा आक्रोश असह्य करणारा होता.