मोटारसायकलस्वारास उडवून ट्रकचालक फरार

अपघातात एक जण जागीच ठार : कुकसा फाट्यानजीकची घटना

लोकमत न्यूज नेटवर्कशिरपूर जैन : मोटारसायकलला दिलेल्या धडकेत मोटारसायकलस्वार जागीच ठार झाल्याची घटना मंगळवारी दुपारच्या सुमारास कुकसा फाट्यावर घडली. अपघातानंतर ट्रक चालक फरार होण्यात यशस्वी झाला. सतीश वामन कुटे असे मृतकाचे नाव आहे.मंगळवारी दुपारी ४.१५ वाजताच्या सुमारास सतीश कुटे हे संभाजी कुटे यांच्यासह दुचाकीने पांगरी कुटे जात होती तर मालेगाववरून मेहकरकडे ट्रक जात होता. कुकसा फाट्यावर या दोन्ही वाहनांत समोरासमोर धडक झाली. यामध्ये दुचाकीवरील सतीश कुटे हे जागीच ठार झाले तर संभाजी शिवाजी कुटे हे जखमी झाले. या अपघातानंतर गावातील नागरिकांनी ट्रक अडवून रास्ता रोको केला. यामुळे मेहकर ते मालेगाव या मार्गावरील वाहतूक एक तास ठप्प होती. दोन्ही बाजूने जवळपास एक कि.मी. अंतरापर्यंत वाहनांची रांग लागली होती. घटनेची माहिती मिळताच शिरपूर पोलीस स्टेशनचे ठाणेदार हरिष गवळी यांनी आपल्या चमूसह घटनास्थळ गाठले. यावेळी गवळी यांनी गावकऱ्यांशी चर्चा करून गाावकऱ्यांची समजूत काढली. यामुळे गावकऱ्यांनी रास्ता रोको मागे घेत पोलीस प्रशासनाला सहकार्य केले, तसेच पोलिसांनी वाहतूक सुरळीत करण्यात मोलाची भूमिका बजावली. सदर ट्रक डोणगावजवळ पकडल्याची माहिती आहे. ट्रकचालक फरार आहे.