मंगरूळपीर : सध्या शेतकऱ्यांची पीकविमा भरण्यासाठी लगबग सुरू आहे. एक राष्ट्र एक योजना अंतर्गत राबवण्यात येणाऱ्या प्रधानमंत्री पीकविमा योजना अंतर्गत ऑनलाइन अर्ज करण्यासाठी सर्व्हर डाऊन असल्याने केंद्र संचालक व शेतकरी वर्ग चांगलेच हतबल झालेले दिसून येत आहे.
ही स्थिती तालुक्यात नव्हे तर सगळीकडे असू शकते, कारण ज्या वेबसाईट अंतर्गत हा विमा काढला जातो ती साइटच सध्या स्थितीत खूपच हळू काम करीत आहे. नैसर्गिक आपत्ती, कीड व अन्य रोगांमुळे पिकांचे नुकसान झाले तर शेतकऱ्यांना मदत म्हणून सन २०१६ मध्ये प्रधानमंत्री पीकविमा योजना कार्यान्वित करण्यात आली. या योजनेअंतर्गत शेतकऱ्यांना मदतसुद्धा झाली आहे. खरीप हंगाम सुरू होताच शेतकरी वर्ग आपल्या शेतात पेरलेल्या पिकांचे विमा संरक्षण करण्याकरिता प्रधानमंत्री पीकविमा योजना अंतर्गत विमा काढतात. सन २०२१-२२ या चालू हंगामाकरिता प्रधानमंत्री पीकविमा योजना अंतर्गत पिकांचे विमा काढण्याकरिता शेतकरी ऑनलाइन केंद्रांना भेट देत आहे, परंतु त्या ठिकाणी सर्व्हर काम करीत नसल्यामुळे शेतकरी हतबल झालेला दिसत आहे. दिवसभरात मोठ्या मुश्किलीने हे एक ते दोन फॉर्म यशस्वीरित्या फिलअप होतात. वरूनच प्रॉब्लेम असल्याने शेकडो शेतकऱ्यांनी फॉर्म भरलेले असतानासुद्धा ते फॉर्म फिलअप करता येत नाही. यामुळे शेतकरी वर्ग त्रस्त झाला आहे. तसेच १५ जुलै ही पीकविमा भरण्याची अंतिम तारीख असून अनेक शेतकऱ्यांनी पीकविमा भरला नसल्याने ही तारीख वाढविण्याची गरज आहे.
-------------
तारीख वाढविण्याची मागणी
तालुक्यातील शेकडाे शेतकरी विविध अडचणींमुळे पीकविमा काढू शकले नाहीत. १५ जुलै शेवटची तारीख असून यात वाढ करण्याची मागणी शेतकरीवर्गातून केल्या जात आहे.