कापूस बीजोत्पादनासाठी चार गावांची निवड!

कृषी समृद्धी प्रकल्पातंर्गत कापूस उत्पादक शेतक-यांना निविष्ठांचे वाटप.

वाशिम, दि. २४- कृषी समृद्धी समन्वयित कृषी विकास प्रकल्प, करडाच्यावतीने तालुक्यातील ग्राम केकतउमरा, सावरगाव, तामसाळा आणि कुंभारखेडा या चार गावांची कापूस बीजोत्पादनाकरिता निवड झाली आहे. सोमवार, २४ ऑक्टोबर रोजी संबंधित चारही गावांमधील तब्बल १३१ लाभार्थींंंना निविष्ठा वाटप करण्यात आली. यामध्ये विविध प्रकारचे खत व औषधीचा समावेश होता. यावेळी शेतकर्‍यांना बीजोत्पादनासंबंधी तज्ज्ञांकडून मार्गदर्शन करण्यात आले. कापूस बीजोत्पादन कार्यक्रमाच्या यशस्वीतेसाठी कृषी समृद्धी प्रकल्प, वाशिम क्लस्टरचे रमेश बादाडे, संदीप बकाल, मदन श्रीखंडे, आर. पी. तायडे, एस. डब्ल्यू. काळे व केकतउमरा कृषी समृद्धी ग्रामविकास समितीचे सचिव प्रवीण पट्टेबहादूर, तामसाळाचे दीपक लाहोरकर, सावरगावचे शंकर तडस, कुंभारखेडा येथील संजय पडघान आदींनी पुढाकार घेतला. कार्यक्रमास गावकर्‍यांची मोठय़ा संख्येने उपस्थिती होती.