वाशिम : कोरोना नियमांचे काटेकोर पालन म्हणून घराबाहेर पडताना तोंडावर मास्क लावले जात आहे. दुसरीकडे मास्कमुळे त्वचेला खाज सुटण्याबरोबरच इतरही त्वचारोग उद्भवत असल्याचे समोर येत आहे.
कोरोना विषाणूचा संसर्ग होऊ नये, यासाठी चेहऱ्यावर मास्क लावणे बंधनकारक करण्यात आले. पण मास्कच्या वापरामुळे काही जणांना चेहऱ्यावर बारीक पुरळ, त्वचेला खाज सुटणे आणि रॅशेजचा त्रास होत असल्याचे दिसत आहे.
०००
मास्क आवश्यकच, पण असे करा त्वचेचे रक्षण..!
कोरोना विषाणू संसर्गाचा प्रादुर्भाव रोखण्यासाठी मास्क आवश्यकच आहे. चेहऱ्यावर मास्क घट्ट बांधल्याने श्वास घेतानाही अडचणी निर्माण होतात. घाम, चेहऱ्यावरील अतिरिक्त तेल (तेलकट त्वचा), धूळ, मातीचे कण चेहऱ्यावर लावलेल्या मास्कवर जमा होतात. वापरत असलेले मास्क स्वच्छ आहे की नाही, याची खात्री करून घेणे आवश्यक आहे. चेहरा नियमितपणे साबणाने धुणे गरजेचे आहे. तोंडाला घट्ट होणारे मास्क वापरणे टाळा. सैल असलेल्या मास्कचा वापर करावा. शक्यतोवर एन-९५ किंवा सर्जिकल मास्कचा वापर करावा. कापडी मास्क वापरत असाल तर ते नीट धुणे आणि सुकवणे अतिशय आवश्यक आहे. कापडी मास्कवर सूक्ष्म जीवजंतूंचा प्रादुर्भाव होणार नाही, याची काळजी घ्यावी.
०००००००००००००००
सॅनिटायझरपेक्षा साबण बरे
सॅनिटायझरमध्ये अल्कोहोल असते. त्यामुळे सतत ते वापरले तर त्वचेला खाज सुटण्याचे प्रकार वाढतात. हात धुण्याची सुविधा उपलब्ध नसेल तरच सॅनिटायझरचा वापर करणे योग्य ठरते. जेथे हात धुण्याची व्यवस्था आहे ,तेथे शक्यतोवर सॅनिटायझर न वापरता साबण आणि पाण्याने हात धुवावे.
०००००००००००००००००
त्वचाविकाराचे रुग्ण वाढले
कोट
मास्कमुळे विविध प्रकारचे त्वचाविकार जडत असल्याचे रुग्ण येत आहेत. डिस्पोजल मास्क दररोज बदलायला हवा. एकच मास्क वारंवार वापरल्यास त्वचेचे विकार होण्याची भीती आहे.
- डॉ. विठ्ठल गोटे
त्वचारोग तज्ज्ञ, वाशिम.
००००
कोरोनाचा संसर्ग रोखण्यासाठी मास्क आवश्यकच आहे. शक्यतोवर सैल असलेला मास्क वापरावा. एक मास्क एका दिवसापुरताच वापरावा.
- डॉ. नीलिमा चव्हाण
त्वचारोग तज्ज्ञ, वाशिम.