वाशिम जिल्हय़ातील १९५ भूमिहीनांना आता मिळणार जमीन

कर्मवीर दादासाहेब गायकवाड सबळीकरण व स्वाभिमान योजनेचा सुखद परिनाम.

संतोष वानखडे / वाशिम: कर्मवीर दादासाहेब गायकवाड सबळीकरण व स्वाभिमान योजनेने अनुसूचित जाती प्रवर्गातील भूमिहीनांना शेतकर्‍यांच्या पंक्तीत बसविण्याचे काम वाशिम जिल्हय़ात केले आहे. २00६ ते २0१४ या दरम्यान जिल्हय़ात ७५५ एकर जमीन उपलब्ध झाल्याने १९५ भूमिहीन लाभार्थींच्या नावावर सात-बारा तयार झाला आहे. गोरगरीब व भूमिहीन लाभार्थींचा आर्थिक स्तर उंचाविण्यासाठी समाजकल्याण विभाग विविध योजना राबवित आहे. त्यापैकीच एक असलेल्या कर्मवीर दादासाहेब गायकवाड सबळीकरण व स्वाभिमान योजनेंतर्गत भूमिहीनांना दोन एकर बागायत तर चार एकर कोरडवाहू जमीन दिली जाते. जमीन खरेदीसाठी शासनाकडून ५0 टक्के अनुदान, तर उर्वरित ५0 टक्के रक्कम १0 वर्षांसाठी बिनव्याजी स्वरूपात दिली जाते; पात्र लाभार्थींना जमीन देण्यासाठी शासनाकडून शासकीय दरात प्रथम जमीन खरेदी केली जाते. जमीन विकण्यासाठी कुणी तयार झाला, तर लाभार्थींना जमीन दिली जाते. २00४ ते २0१४ या १0 वर्षात सहा वेळा जमीन उपलब्ध झाल्याने याचा फायदा १९५ भूमिहीन शेतकर्‍यांना झाला. चार वर्षे जमीन उपलब्धच झाली नसल्याने त्या-त्या वर्षी सदर योजना निधी असूनही ठप्पच राहिली. शासनाने प्रथम जमीन खरेदी केली आणि नंतर त्या जमिनीचे वाटप १९५ भूमिहीनांना केले. २0१४-१५ या वर्षात सदर योजनेंतर्गत ३0 एकर जमीन उपलब्ध झाल्याने प्राप्त प्रस्तावांमधून या जमिनींचे वाटप करण्याची प्रक्रिया सुरू आहे. दरम्यान , समाजकल्याण विभागाचे सहायक आयुक्त एम जी वाठ यांच्याशी संपर्क साधला असता त्यांनी या योजनेंतर्गत जमीन उपलब्ध झाल्यानंतर पात्र लाभार्थींकडून अर्ज मागविले जातात. उपलब्ध जमिनीनुसार जिल्हा निवड समिती ईश्‍वरचिठ्ठीतून लाभार्थींची निवड करते. आतापर्यंत १९५ लाभार्थींंना ७५५ एकर जमिनीचे वाटप करण्यात आले असल्याचे सांगीतले.