प्रजासत्ताक दिनाच्या पूर्वसंध्येला जिल्हाधिकारी कार्यालयासमोर उपोषण

मैराळडोह, किन्हीराजा येथील नागरिकांचा समावेश

वाशिम: विविध मागण्या निकाली काढण्याच्या उद्देशाने जिल्हय़ातील काही गावांतील नागरिक प्रजासत्ताक दिनाच्या पूर्वसंध्येला जिल्हाधिकारी कार्यालयासमोर उपोषण आंदोलनाला बसले आहेत. प्रजासत्ताक दिनी पालकमंत्री व जिल्हाधिकारी उपोषणाची दखल घेतील, या आशेतून उपोषणकर्त्यांची संख्या कमालीची वाढली असल्याचे दिसून येते. वाशिम: छत्रपती शिवरायाचे अंगरक्षक राहिलेल्या वीर जीवाजी महाले यांच्या प्रतापगड येथील प्रस्तावित स्मारक बांधकामाच्या भूमिपूजनास दिरंगाई होत आहे. या अन्यायाविरोधात नाभिक समाजाने जिल्हाधिकारी कार्यालयासमोर २५ जानेवारीपासून अर्धनग्न आमरण उपोषण सुरू केले. या उपोषणात पांडुरंग वाघमारे, गजानन राऊत, अनिल पंडित, जगदीश आळणे, विष्णू पोफळे, प्रकाश गाडेकर, गजानन गाडेकर, मारोतराव सुरेकर, जगन्नाथ ठोंबरे, विजय सापाटे, दत्तराव जाधव या ११ जणांचा समावेश आहे. उपोषणाला खासदार भावना गवळी, आमदार अमित झनक, विष्णुपंत भुतेकर यांनी भेटी दिल्यात. मैराळडोह, किन्हीराजा व एरंडा येथील नागरिक गतवर्षीच्या अतिक्रमण सर्व्हेचा चौकशी अहवाल मिळण्याच्या मागणीसाठी स्वाभिमानी रिपब्लिकन पक्षाचे जिल्हाध्यक्ष महादेव धवसे यांच्या नेतृत्वात उपोषणाला बसले. घरकुलासाठी जागा उपलब्ध करून देण्याच्या मागणीसाठी गत चार दिवसांपासून उपोषणाला बसलेल्या रिसोड तालुक्यातील गोवर्धन येथील गावकर्‍यांचे उपोषण खासदार भावना गवळी यांच्या मध्यस्थीनंतर २५ जानेवारीला मागे घेण्यात आले. गावठाण वाढ करून जागा देण्याचे आश्‍वासन मिळाल्याने उपोषणकर्त्यांनी आंदोलन मागे घेतले. यावेळी शिवसेना तालुकाप्रमुख महादेव ठाकरे, सुभाष तापडिया, आबादास शेळके, डॉ. सदानंद वाघ यांच्यासह ४0 उपोषणकर्ते उपस्थित होते.