शेतकऱ्यांना नुकसान भरपाईची प्रतीक्षा

जिल्ह्यात १९ ते २१ मार्च या कालावधीत वादळी वारा, अवकाळी पावसासह गारपीट झाली. २० मार्च रोजी ६,६९७ शेतकऱ्यांच्या ४,८८० हेक्टरवरील पिकांचे नुकसान झाले. त्यानंतरही अवकाळी पाऊस व गारपीट सुरूच असून, नुकसानग्रस्त गावे व शेतकऱ्यांचा आकडा वाढला आहे. त्यानुषंगाने १९ ते २१ मार्च या कालावधीत झालेल्या नुकसानीचा सुधारित अहवाल शासनाकडे पाठविण्यात आला होता. त्यानुसार, वाशिम तालुक्यातील ६ महसुली मंडळातील ३९ गावांमध्ये १,६९३ हेक्टरवरील कांदा, कडधान्य व भाजीपाला पिकांचे नुकसान झाले. यामुळे २,१२३ शेतकरी बाधित झाले आहेत. मालेगाव तालुक्यातील ६ महसुली मंडळातील ४० गावांमध्ये १,१७० हेक्टरवरील उन्हाळी सोयाबीन, मूग, गहू, पपई, आंबा, उडीद, तीळ, कांदा, कडधान्य व भाजीपाला पिकांचे नुकसान झाले. यामुळे १,८६१ शेतकरी बाधित झाले आहेत. रिसोड तालुक्यातील ३ महसुली मंडळातील २० गावांमध्ये १,६८४ हेक्टरवरील पिकांचे नुकसान झाले असून, २,१८७ शेतकरी बाधित झाले आहेत. मंगरूळपीर तालुक्यातील ३ महसुली मंडळातील २२ गावांमध्ये ५०९ हेक्टरवरील पिकांचे नुकसान झाले असून, ५५८ शेतकरी बाधित झाले आहेत, तसेच मानोरा व कारंजा तालुक्यातील ४ महसुली मंडळातील २१ गावांमध्ये ५३६ हेक्टरवरील पिकांना फटका बसला आहे. यात ८७२ शेतकरी बाधित झाले आहेत. या शेतकऱ्यांना शासनाकडून एकरी १० हजार रुपये मदत द्यावी, अशी मागणी शेतकऱ्यांमधून होत आहे.