वाशिम : दारूच्या आहारी गेलेल्यांचे व्यसन सोडविण्याचा एक प्रयत्न म्हणून वाशिम शहरातील एका डॉक्टर दांपत्याने सामाजिक बांधिलकीतून पुढाकार घेतला आहे. दर महिन्याला किमान एक शिबिर घेऊन किमान ५० जणांची मोफत तपासणी आणि आवश्यक औषधीही मोफत दिली जाणार आहे. डॉ. विवेक साबू आणि डॉ. शुभांगी साबू असे या दांपत्याचे नाव आहे.
वाशिम येथे वैद्यकीय क्षेत्रात सेवा देत असताना, अपघाताच्या घटनांमध्ये काहींना जीव गमवावा लागणे, काहींना अपंगत्व येणे आदी बाबी डॉ. विवेक साबू यांना जवळून पाहता आल्या. अपघाताच्या काही घटनांमध्ये वाहन चालविणारा हा दारूच्या नशेत असल्याचेही दिसून आले. दारूच्या नशेपायी संसारातही कलह निर्माण होतो तसेच मानसिक स्वास्थही बिघडते. दारूच्या आहारी गेलेल्यांचे व्यसन सोडविण्याचा एक प्रामाणिक प्रयत्न म्हणून डॉ. विवेक आणि डॉ. शुभांगी या साबू दांपत्याने सामाजिक बांधिलकीतून दरमहा मोफत शिबिर घेण्याचा उपक्रम हाती घेतला आहे. दरमहा १ तारखेला होणाऱ्या या शिबिरात किमान ५० जणांची मोफत तपासणी आणि आवश्यक ती औषधीदेखील मोफत दिली जाणार आहे. दरम्यान, कारंजा येथील दारूमुक्तीचे कार्यकर्ता दिलीप गिलडा यांनी आतापर्यंत १५ हजार जणांचे दारूचे व्यसन सोडविले आहे. दारूचे व्यसन सोडण्यासंदर्भातील डॉ. साबू यांच्या उपक्रमाला गिलडा यांचे मार्गदर्शन लाभणार असून, ते दरमहा आयोजित शिबिरात प्रबोधन करणार आहेत.
..........
कोट
वैद्यकीय क्षेत्रात सेवा देत असताना कुठेतरी समाजाचे देणं आहे या उदात्त भावनेतून दारूमुक्तीसाठी एक छोटासा प्रयत्न म्हणून दरमहा १ तारखेला मोफत शिबिर घेणार आहोत. दारूच्या व्यसनाचे दीर्घकालीन दुष्परिणाम असल्याने नागरिकांनीदेखील व्यसनाच्या आहारी जाऊ नये.
- डॉ. विवेक साबू, वाशिम