सार्वजनिक आरोग्य विभागाच्या सुचनेनुसार खासगी रुग्णालयांमध्ये उपचार घेत असलेल्या कोरोना बाधित रुग्णांकडून विहित दरापेक्षा अधिक शुल्क आकारल्यासंबंधी शासनस्तरावर तक्रारी प्राप्त झाल्या. त्यामुळे नगरपालिका क्षेत्रात जिल्हाधिकाऱ्यांनी त्यांच्या स्तरावर भरारी पथकांची नेमणूक करण्याचे आदेश आरोग्य विभागाने दिले होते. त्यानुसार, वाशिम शहरातील २२ रुग्णालयांकडून आकारल्या जाणाऱ्या देयकांवर लक्ष ठेवले जात आहे. सदर रुग्णालयांमध्ये दाखल कोरोना बाधित रुग्णांच्या देयकांची तपासणी करणे व विहित दरानुसार दर आकारणी केली जाते किंवा नाही, याची तपासणी करण्याची जबाबदारी पथक प्रमुखांवर सोपविण्यात आलेली आहे.
दरम्यान, आतापर्यंत वाशिममधील एकमेव सेक्युरा हाॅस्पिटलच्या तपासणीत ५७१ रुग्णांच्या देयकात त्रुटी आढळून आल्या.
..............
अशी आहे आकडेवारी
२२
कोरोनावर उपचार केले जाणारे शहरातील हाॅस्पिटल
२०
जिल्हाधिकाऱ्यांनी नियुक्त केलेले ऑडिटर्स
५७१
बिल जास्त घेतल्याच्या तक्रारींची संख्या
..................
रुग्णालयांची कसून तपासणी
कोरोना बाधित रुग्णांवर उपचार करणाऱ्या वाशिम शहरातील २२ रुग्णालयांची नियुक्त ऑडिटर्सकडून कसून तपासणी केली जात आहे.
रुग्णालयांकडून आकारण्यात आलेल्या प्रत्येक रुग्णाच्या देयकाची व तक्रारदार रुग्णांच्या देयकांचीही तपासणी यादरम्यान केली जाणार आहे.
..................
३२५ जणांना मिळाले पैसे
कोरोना संसर्गाच्या पहिल्या लाटेत वाशिममध्ये सेक्युरा हाॅस्पिटलला कोविड केअर हाॅस्पिटलचा दर्जा देण्यात आला होता.
या रुग्णालयात उपचार घेतलेल्या रुग्णांकडून अवाजवी देयक आकारल्याप्रकरणी सेक्युरा हाॅस्पिटलची तपासणी करण्यात आली. यासंदर्भातील ५७१ प्रकरणांपैकी ३२५ प्रकरणे निकाली काढून संबंधितांना १३ लाखांपेक्षा अधिक रक्कम परत करण्यात आली.
................
कोट :
शासनाच्या आदेशाची अंमलबजावणी करून खासगी कोविड हाॅस्पिटलकडून कोरोना बाधितांकडून आकारण्यात आलेल्या देयकांची सखोल तपासणी करण्यात येत आहे. यापूर्वी पहिल्या लाटेत झालेल्या तपासणीदरम्यान सेक्युरा हाॅस्पिटलने आकारलेल्या देयकांमध्ये त्रुटी आढळून आल्या. ५७१ जणांचे पैसे परत करण्याचे आदेश देण्यात आले होते. त्यापैकी ३२५ प्रकरणे निकाली काढण्यात आली आहेत.
- शन्मुगराजन एस.
जिल्हाधिकारी, वाशिम.