गतवर्षी केंद्र शासनाने कोरोना नियंत्रणासाठी व्यापक उपाययोजना राबविण्यास सुरुवात केली. राज्य शासनानेही मार्च २०२० पासून केंद्र शासनाच्या लॉकडाऊनची अंमलबजावणी करण्यासह जिल्हा सीमाबंदी आणि इतर प्रतिबंध लावले. त्यात मास्क वापरणे बंधनकारक करून मास्क न लावणाऱ्यांवर दंडात्मक कारवाई करण्याचे आदेश सर्व जिल्हा प्रशासनाला दिले. त्यानुसार वाशिम जिल्ह्यात जिल्हाधिकाऱ्यांच्या निर्देशानुसार वाशिम पोलिसांनी पोलीस अधीक्षक वसंत परदेशी यांच्या मार्गदर्शनात मास्क न लावणाऱ्यांवर कारवाईची मोहीम सुरू केली. त्यात २१ मार्च २०२० ते १५ मार्च २०२१ दरम्यान वर्षभराच्या कालावधीत ३७,५८२ लोकांवर कारवाई करीत त्यांच्याकडून १ कोटी ७७ लाख ९५ हजार ९०० रुपयांचा दंड वसूल केला.
-----------
महिनाभरात नो-मास्कप्रकरणी ६५१६ जणांना दंड
जिल्हा पोलीस अधीक्षकांच्या मार्गदर्शनात पोलिसांनी मास्क न लावणाऱ्या वाहनचालकांसह नागरिकांवर २१ मार्च २०२० पासून सुरू केलेली कार्यवाही मध्यंतरी कोरोना संसर्ग नियंत्रित असताना बंद ठेवण्यात आली होती; परंतु जिल्ह्यात यंदा फेब्रुवारी महिन्यापासून पुन्हा कोरोना संसर्ग वाढत असल्याने जिल्हाधिकाऱ्यांच्या आदेशानुसार मास्क न लावणाऱ्यांवर १८ फेब्रुवारीपासून कारवाई सुरू करण्यात आली. त्यात १८ फेब्रुवारी २०२१ ते १५ मार्च २०२१ दरम्यान महिनाभराच्या काळात ६५१६ लोकांकडून ३२ लाख ५८ हजार रुपयांचा दंड पोलिसांनी वसूल केला.
--------------
नियमांच्या उल्लंघनप्रकरणी गुन्हे
कोरोना संसर्ग नियंत्रणासाठी जिल्हाधिकाऱ्यांनी मार्च २०२० पासून नियम लागू केले होते. या नियमांचे उल्लंघन करणाऱ्यांवर दंडात्मक कारवाईसह गुन्हे दाखल करण्याचे आदेश पोलिसांना देण्यात आले होते. त्यात २१ मार्च २०२० ते १५ मार्च २०२१ पर्यंत २९३० लोकांवर पोलिसांनी गुन्हे दाखल केले.
-----------
ट्रिपल सीटच्या १३१६० कारवाया
कोरोना नियंत्रणासाठी मास्क न लावणाऱ्यांवर जिल्हाधिकाऱ्यांच्या आदेशानुसार दंडात्मक कारवाई करतानाच दुचाकीवर निर्धारित आसन क्षमतेपेक्षा अधिक प्रवासी आढळून आल्याप्रकरणीही पोलिसांनी कारवाई केली. त्यात ट्रिपल सीटप्रकरणी १३ हजार १६० दुचाकीचालकांकडून २६ लाख ३२ हजारांचा दंड वर्षभरात वसूल केला.
-------------
कोरोना नियंत्रणातील वर्षभराच्या कारवाया
१) दाखल गुन्हे -२९३०
२) विनामास्क कारवाई -१,७७,९५,९००
३) ट्रिपल सीट कारवाई -१३,१६०
४) मंगल कार्यालय, हॉल कारवाई -०७
---------------------
कोट : कोरोना संसर्ग नियंत्रणासाठी निर्गमित आदेशाची कठोर अंमलबजावणी पोलिसांनी केली. त्यात वर्षभरात मास्क न लावणाऱ्यांकडून १ कोटी ७७ लाख, ९५ हजार ९०० रुपयांचा दंड वसूल केला. ही कारवाई दंडासाठी नव्हे, तर लोकांना शिस्त लावण्यासाठी आहे. नागरिकांनी स्वत:चा आणि समाजाच्या सुरक्षेचा विचार करून कोरोना संसर्ग नियंत्रणासाठी प्रशासनाने घालून दिलेल्या नियमांचे पालन करावे.
- वसंत परदेशी,
जिल्हा पोलीस अधीक्षक, वाशिम