एकुर्ली फाट्यावरील घटना अल्लीपूर : रस्त्याच्या कडेला उभ्या असलेल्या ट्रॅक्टरवर भरधाव दुचाकी धडकल्याने झालेल्या अपघातात मुलगा ठार झाला तर आई गंभीर जखमी आहे. हा अपघात धोत्रा-अल्लीपूर मार्गावर एकुर्ली फाट्याजवळ बुधवारी रात्री ९ वाजता झाला. मनोज भीमराव टिपले (२२) रा. सिरोड असे मृतकाचे नाव आहे. तर शीला टिपले (५०) यांच्यावर सेवाग्राम रुग्णालयात उपचार सुरू आहे. पोलीस सुत्रानुसार, मनोज हा त्याच्या आईला घेवून दुचाकी क्र. एमएम ३१ व्ही. ८३४९ ने जात होता. दरम्यान रस्त्याच्या कडेला उभा असलेला ट्रॅक्टर क्रमांक एमएच ३२ बी ३३५१ वर दुचाकी धडकली. यात मनोज व त्याची आई गंभीर जखमी झाली. जखमींना उपचारार्थ सेवाग्राम रुग्णालयात नेत असताना त्याचा वाटेतच मृत्यू झाला. घटनेचा तपास ठाणेदार मसराम व आरीफ फारूखी करीत आहेत.(वार्ताहर) अपघातात युवक गंभीर जखमी खरांगणा (मो.)-खड्डा चुकविताना झालेल्या अपघातात दोघे जण गंभीर जखमी झाले. सतीश गिरडकर (२२) व मुकेश सिंधुरकर दोन्ही रा. मजरा असे जखमीचे नाव आहे. ते दुचाकीने मजरा येथून आंजी येथे जात होते. खरांगणा ते वर्धा मार्गावर खड्ड्यांची मालिकाच आहे. सतीश हा अपल्या मामेभावासह आंजी येथे जात असताना रस्त्यावरील खड्ड्यात पाणी साचल्यामुळे खड्ड्याचा अंदाज न आल्याने तोल जाऊन दुचाकीसह दोघेही रस्त्यावर पडून जखमी झाले. दोघांनाही तातडीने सेवाग्राम रुग्णालयात उपचाराकरिता दाखल केले.(वार्ताहर)
दुचाकी अपघातात मुलगा ठार आई गंभीर
By admin | Updated: July 15, 2016 02:24 IST