चालते-फिरते ‘बायोस्कोप’ झाले दुर्मीळ

पूर्वीच्या काळी लहान मुलांना चित्रपट पाहण्यास घरच्यांंचा मज्जाव असायचा.

वर्धा : पूर्वीच्या काळी लहान मुलांना चित्रपट पाहण्यास घरच्यांंचा मज्जाव असायचा. चित्रपट पाहणे ही बाब मोठ्यांपर्यंत मर्यादित होती. लहान मुलांकरिता यातून पर्याय म्हणून चालते- फिरते ‘बायोस्कोप’ हे ग्रामीण भागात व शहरांमध्ये लोकप्रिय होते. यातून लहान मुलांना इतिहासकालीन थोर पुरुषांची चित्रे, प्राण्यांची चित्रे, देवीदेवतांची चित्रे दाखवून त्यांचा आनंद द्विगुणीत केला जात असे. हे काम बास्कोपवाला करीत. परंतु कालौघात डिजीटल क्रांतीच्या झोतात हा प्रघात मागे पडला.काही दशकांपूर्वी चालते-फिरते बायोस्कोप हे लहान मुलांसाठी एक आकर्षणच होते. गावामध्ये बायस्कोपची पेटी घेवून फेरीवाला आला असता त्याच्या जवळ लहान मुलांची जत्राच भरायची. बायस्कोपच्या त्या पेटीमध्ये आता आपणास नवीन काय पहावयास मिळेल या उत्सुकतेने लहान मुले त्याच्याकडे पैसे देवून नंबर लावण्याची तेवढीच धडपड करायची. एकावेळी ४ ते ५ चिमुकल्यांना पाहण्याची सुविधा असल्याने ज्याचा नंबर आधी लागेल ती मुले आनंदी होवून त्या बायस्कोपच्या पेटीला डोळे लावून चिपकून बसायची. प्रत्येकाला त्यातील चित्रे बघण्यासाठी स्वतंत्र अशी गोल वर्तूळाकार छिद्रे असायची व त्यातून ती मुले ती चित्रे पाहण्याचा आनंद घेत असत. दोन मिनीटांचा मुलांचा बायस्कोपवरील चित्रांचा खेळ आटोपला की त्यांचा आनंद द्विगुणीत होत असे. अशाप्रकारे दोन-तीन तास गावात थांबवून तो बायोस्कोपवाला आपली कमाई करायचा व पुढील गावाकडे प्रस्थान करायचा. परंतु सद्याच्या काळात ठिकठिकाणी वाढलेल्या टॉकीज, घरोघरी आलेले टेलीव्हीजन व केबल कनेक्शन, इंटरनेट सुविधा, मोबाईलवर आॅनलाईन चित्रपट पाहण्याची सुविधा अशा एक ना अनेक सुविधा उपलब्ध झाल्याने चालते-फिरते बायोस्कोप आता दिसने दुर्मिळ झाले आहेत. डिजीटल तंत्रज्ञानाचा वापर करणारे आताच्या मुलांना बायोस्कोप हा शब्दही माहीत नसल्याचा प्रत्यय येतो.(स्थानिक प्रतिनिधी)