दोन माकडांचा मृत्यू

ठाणे : ठाण्यातील वागळे इस्टेट परिसरात शनिवारी सायंकाळी दोन माकडांचा संशयास्पद मृत्यू झाल्याची घटना समोर आली. यातील एक माकड खाली पडले होते. तर दुसरे झाडावर लटकलेल्या अवस्थेत होते. यामध्ये मादी माकड झाडावर लटकलेल्या अवस्थेत दिसून आले आहे तर तिचे पिल्लू खाली मृतावस्थेत आढळले. या दोन्ही माकडांचा मृत्यू नेमका कशामुळे झाला हे अद्याप समजू शकलेले नाही. वागळे इस्टेट भागातील रोड नंबर २७ आईस्क्रीम कंपनीजवळ ही घटना घडली. या घटनेची माहिती मिळताच ठाणे महापालिकेच्या आपत्ती व्यवस्थापन विभागाने घटनास्थळी धाव घेतली. त्यानंतर त्यांनी वनविभागाला यासंदर्भात सांगितले आहे. वनविभागाचे कर्मचारी आता घटनास्थळी धाव घेऊन पंचनामा करणार आहेत. त्यानंतर या आई आणि बाळाचा अर्थात या दोन्ही माकडांचे शवविच्छेदन केले जाणार आहे. त्यानंतर या माकडांचा नेमका मृत्यू कशामुळे झाला, हे स्पष्ट होणार आहे.