मुंब्य्रात दोन मृतदेह आढळले

मुंब्रा : काही तासांच्या अंतराने गुरुवारी मुंब्य्रात दोन वेगवेगळ्या ठिकाणी दोन मृतदेह आढळून आले. यातील एका मृतदेहाची ओळख पटली असून, एक अनोळखी आहे. पहिला अनोळखी मृतदेह बायपास रस्त्याजवळ आढळून आला, तर दुसरा अब्दुल सत्तार या ८५ वर्षांच्या वृद्धाचा मृतदेह येथील अमृतनगर परिसरातील योगी गृहसंकुलाच्या एफ विंगमधील रूम नंबर २०३ मध्ये आढळून आला. ते घरात एकटे राहात होते. घरामधून असह्य दुर्गंधी आल्यानंतर ते मृत झाले असल्याचे उघडकीस आले. दरम्यान, पोलिसांनी अनोळखी मृतदेह उत्तरीय तपासणीसाठी कळव्यातील छत्रपती शिवाजी महाराज रुग्णालयात पाठवला असून कायदेशीर कारवाई पूर्ण करून सत्तार यांचा मृतदेह त्यांच्या नातेवाइकांच्या ताब्यात दिला.