ठाणे: शहरातील कापूरबावडी येथून प्रवास करणाऱ्या भावेशभाई वाडेर (२७, रा. भिवंडी) आणि कोपरी येथील रहिवासी कांता घोणे (४६) या दोघांचे मोबाईल चोरीस गेल्याच्या घटना गुरुवारी अनुक्रमे चितळसर आणि कोपरी पोलीस ठाण्यात दाखल झाल्या आहेत. मोबाईल चोरीच्या वाढत्या घटनांमुळे नागरिकांमध्ये चिंता व्यक्त होत आहे.
भिवंडीतील रहिवासी भावेशभाई हे १२ ऑगस्ट रोजी सकाळी १० वाजण्याच्या सुमारास ठाण्यातील सिनेवंडर मॉल, कापूरबावडी ते मानपाडा बसस्टॉप यादरम्यान बसने प्रवास करीत होते. त्याचवेळी त्यांचा २५ हजाराचा मोबाईल अज्ञात चोरट्यांने लंपास केला. याप्रकरणी त्यांनी चितळसर पोलीस ठाण्यात चोरीचा गुन्हा दाखल केला आहे. पोलीस उपनिरीक्षक प्रियंका शिंदे या अधिक तपास करीत आहेत. दुसऱ्या घटनेत कोपरी येथील रहिवासी घोणे यांच्या घरातून अज्ञात चोरट्यांनी मोबाईलची चोरी केल्याची तक्रार त्यांनी १२ ऑगस्ट रोजी कोपरी पोलीस ठाण्यात दाखल केली. याप्रकरणी पोलीस हवालदार आंब्रे हे अधिक तपास करीत आहेत.