बदलापूर : बदलापुरात एका दुचाकीच्या शोरूममध्ये चोरी झाल्याची घटना घडली आहे. सोमवारी मध्यरात्री ही चोरी झाली. चोरट्याने दुकानाचे शटर वाकवून ही चोरी केली.
बदलापूरच्या कात्रप परिसरातील हायवेवर हे शोरूम आहे. सोमवारी रात्री दीडच्यासुमारास चोरट्याने शोरुममधील ३ आयपॅड, एक मोबाईल, टी-शर्ट आणि जॅकेट असा तब्बल अडीच लाखांचा मुद्देमाल चोरून नेला. ही चोरीची घटना सीसीटीव्ही कॅमेऱ्यातही कैद झाली आहे. या घटनेनंतर सकाळी मॉर्निंग वॉकसाठी बाहेर पडलेल्या नागरिकांनी दुकानाचे वाकलेले शटर पाहून ही बाब पोलिसांना कळवली. याप्रकरणी पोलिसांनी गुन्हा दाखल करून तपासाला सुरुवात केली आहे. शोरूम कल्याण- कर्जत राज्य महामार्ग या मुख्य रस्त्यावर असून, रात्री उशिराही या रस्त्यावरून वाहतूक सुरू असते. मात्र तरीही चोरट्याने केलेली हिंमत पाहता, इतर दुकानदारांमध्ये घबराट पसरली आहे. त्यामुळे आता पोलिसांनी रात्रीच्यावेळी गस्त वाढवण्याची मागणी होत आहे.