कल्याण : कोरोनाच्या वाढत्या प्रादुर्भावावर मुख्यमंत्री उद्धव ठाकरे यांच्याकडून नागरिकांना कोरोना नियम पाळण्याचे आवाहन केले जात आहे. मात्र, त्यांच्या आवाहनाला शिवसेनेच्या माजी नगरसेवकानेच तिलांजली दिल्याचे चित्र शनिवारी कल्याणमध्ये पाहायला मिळाले. ५० जणांच्याच उपस्थितीला परवानगी असताना माजी नगरसेवक सुनील वायले आणि माजी नगरसेविका शालिनी वायले यांच्या मुलीच्या लग्नसोहळ्याला तोबा गर्दी झाली होती. या ठिकाणी दोन लग्नसोहळे होते. यात सोशल डिस्टन्स, मास्क लावणे या नियमांचेही उल्लंघन झाले. दरम्यान, याप्रकरणी वधुपिता वायले यांच्यासह अन्य लग्नसोहळ्यातील वधुपिता सुरेश म्हात्रे आणि भवानी मॅरेज हॉलचे व्यवस्थापक रमेश सिंग यांच्याविरोधात महात्मा फुले चौक पोलीस ठाण्यात गुन्हा दाखल झाला आहे.
कल्याण-डोंबिवलीत दररोज हजारोंच्या संख्येने नवीन रुग्ण आढळत आहेत. मनपा क्षेत्रात त्यांना रुग्णालयात बेडही मिळणे मुश्कील बनले आहे. कोरोनाचा प्रादुर्भाव रोखण्यासाठी राज्य सरकार आणि महापालिका प्रशासन कोरोना नियमांचे पालन करा, असे नागरिकांना सांगत आहेत. मात्र नियम पाळले जात नसल्यामुळे दोन्ही शहरांमधील स्थिती भयावह हाेत आहे. नागरिकांसह आता नगरसेवकही नियमांना तिलांजली देत असून शनिवारच्या लग्नसोहळ्यातून हे समोर आले आहे. यातील एक लग्नसोहळा माजी नगरसेवक सुनील वायले यांच्या मुलीचा होता. याप्रकरणी त्यांच्यासह तेथे पार पडलेल्या अन्य लग्नसोहळ्यातील वधुपिता सुरेश म्हात्रे आणि हॉलचे व्यवस्थापक रमेश सिंग अशा तिघांविरोधात आपत्ती व्यवस्थापन आणि साथरोग प्रतिबंधक कायद्यान्वये गुन्हा दाखल झाला आहे.
ना मास्क, ना साेशल डिस्टन्सिंग
मोकळ्या जागा, लॉन्स, विनावातानुकूलित हॉल या ठिकाणी ५० व्यक्तींनाच हजर राहता येईल, असा नियम असताना पश्चिमेतील काळा (भगवा) तलाव परिसरातील भवानी मॅरेज हॉलमध्ये एकत्रित पार पडलेल्या दोन लग्नसोहळ्यांना तब्बल ९०० ते १०००च्या आसपास पाहुण्यांनी उपस्थिती लावल्याचे महात्मा फुले चौक पोलीस ठाण्याच्या पोलिसांना गस्तीदरम्यान आढळले. यात बहुतांश जणांनी मास्कही परिधान केले नव्हते की सोशल डिस्टन्सिंगही नव्हते.