ठाणे : बुधवारी ठाण्यात राणे विरुद्ध शिवसेनेची बॅनरबाजी पाहायला मिळाली. दुसरीकडे मनसेने राज्य सरकारवर निशाणा साधत पाचपाखाडी येथील मुख्य रस्त्यावर बॅनर लावले आहे. साहेब, राजकीय मेळाव्यात दहीहंडी फोडली व जनआशीर्वाद यात्रा किंवा पक्ष प्रवेशाच्या कार्यक्रमात गणपतीची मिरवणूक काढली तर चालेल काय, असा सवाल करत मनसेने राज्य सरकारला चिमटा घेतला आहे.
कोरोनाच्या पार्श्वभूमीवर सणवार काही काळ बाजूला ठेवण्याचे आवाहन मुख्यमंत्री उद्धव ठाकरे यांनी केले आहे. सलग दुसऱ्या वर्षी दहीहंडी उत्सवाला सरकारने बंदी घातली आहे. यावर मनसेकडून राज्यसरकारच्या निर्णयाचा कडाडून विरोध केला जात आहे. बुधवारी ठाण्यातही याचा प्रत्यय आला. मनसेने राज्य सरकारविरोधात एक बॅनर झळकवला असून यात कोरोना असतानाही राज्यात सुरू असलेल्या राजकीय कार्यक्रमांवर टीका केली आहे. कितीही बंधने घातली, गुन्हे दाखल केले तरी दहीहंडी साजरी करणाऱ्या मंडळांच्या पाठीशी मनसे ठामपणे उभी राहील असा थेट इशारा सोमवारी मनसेचे ठाणे व पालघर जिल्हाध्यक्ष अविनाश जाधव यांनी सरकारला दिला होता. अशातच मंगळवारी ठाण्यात राणे विरुद्ध शिवसेना यात झालेल्या संघर्षावरून मनसेने ही बॅनरबाजी केली आहे. जाधव यांचे या पोस्टरवर नाव असून मनसेच्या प्रतिश मोरे यांनी हे पोस्टर लावले आहे. त्यांच्यासोबतच इतर मनसे पदाधिकाऱ्यांच्या नावाचाही उल्लेख आहे.
राज्यात कोरोना प्रादुर्भावाच्या पार्श्वभूमीवर दहीहंडीला परवानगी नाकारण्यात आली आहे. यावरून मनसे आक्रमक असून, दहीहंडी उत्सव साजरा करण्यावर ठाम आहे.