भिवंडी : गुजरात राज्यातील पोलीस ठाण्यात चोरीच्या गुन्ह्यांत फरार असलेल्या आरोपीचा गुजरात पोलीस व भिवंडी गुन्हे शाखेच्या पोलिसांना गुंगारा देताना, इमारतीच्या चौथ्या मजल्याच्या खिडकीतून पडून मृत्यू झाल्याची घटना निजामपुरा-कसाईवाडा परिसरात शुक्रवारी दुपारी घडली. दरम्यान, पाेलिसांनी ढकलून दिल्याचा आरोप मृताच्या नातेवाइकांनी केल्याने तणाव निर्माण झाला होता.
जमील कुरेशी (वय ३८, रा.कसाईवाडा) असे मृत आराेपीचे नाव आहे. जमील याच्यावर गुजरात येथील वापी पोलीस ठाण्यात गुन्हा दाखल होता. शुक्रवारी गुजरात पोलीस व भिवंडी गुन्हे शाखेचे पोलीस त्याला अटक करण्यासाठी गेले हाेते. त्यावेळी चौथ्या मजल्यावरून पडून त्याचा मृत्यू झाला. जमीलच्या पत्नीने मारहाण करून, जमील याला पाेलिसांनी चाैथ्या मजल्यावरील खिडकीतून फेकून दिल्याचा आराेप केला. त्यामुळे तणाव निर्माण झाला हाेता. त्यानंतर, पोलीस उपायुक्त योगेश चव्हाण यांनी धाव घेत, वातावरण नियंत्रणात आणले. मृतदेह शवविच्छेदनासाठी स्व.इंदिरा गांधी उपजिल्हा रुग्णालयात पाठविण्यात आला आहे. या घटनेची नाेंद निजामपुरा पोलीस ठाण्यात करण्यात आली आहे. मयत जमील कुरेशी यास पकडण्यासाठी गुजरात पोलीस व गुन्हे शाखेचे पोलीस गेले हाेते. तेव्हा जमीलचा चौथ्या मजल्यावरून पडून मृत्यू झाला आहे. या प्रकरणाची सखोल चौकशी करण्यात येईल. यात कुणी दोषी आढळल्यास कारवाई करण्यात येईल, असे चव्हाण यांनी सांगितले.