कल्याण : अजय रावत (२४) या तरुणाला दोघा हल्लेखोरांनी मारहाण करून त्याला गंभीर जखमी केल्याची घटना ४ सप्टेंबरला पहाटे ४ वाजता पश्चिमेतील अहिल्याबाई चौकात घडली होती. अजयचा रविवारी रुग्णालयात उपचारादरम्यान मृत्यू झाला. दरम्यान, या प्रकरणातील दोघा हल्लेखोरांना अटक करण्यात बाजारपेठ पोलिसांना यश आले आहे. रात्रीच्या वेळेस दारू पिण्यास न दिल्याने अजयची दोघांनी दांडक्याने हत्या केल्याचे तपासात उघड झाले आहे.
सुनील चौधरी (वय २७) आणि लुटो महलहार (वय २६) अशी अटक आरोपींची नावे आहेत. दोघेही टिळक चौक, रामवाडी परिसरातील रहिवासी असून ते मूळचे झारखंड राज्यातील निवासी आहेत. अजयकडे दोघांनी दारूची मागणी केली होती. परंतु, अजयने नकार दिल्याने दोघांनी लाकडी दांडक्याने त्याला बेदम मारहाण केली होती. त्यात तो गंभीर जखमी झाला होता आणि नंतर त्याचा रुग्णालयात उपचारादरम्यान मृत्यू झाला होता.
दरम्यान, या गुन्ह्यात कोणताही पुरावा नसताना आरोपींना गजाआड करण्यात बाजारपेठ पोलीस ठाण्याचे पोलीस निरीक्षक (गुन्हे) राजेंद्र अहिरे यांच्यासह अन्य पोलीस अधिकारी आणि कर्मचाऱ्यांना यश आले. खबऱ्यामार्फत मिळालेल्या माहितीनुसार टिळक चौकातील एका बांधकाम साइटवर सापळा लावून बुधवारी दोघा आरोपींना अटक केल्याची माहिती वरिष्ठ पोलीस निरीक्षक यशवंत चव्हाण यांनी दिली.
------------------