भिवंडी : महापालिका क्षेत्रातील कल्याण नाका ते पट्टीनाक्यावरील जोडणाऱ्या स्व. राजीव गांधी उड्डाणपुलावर मोठ्या प्रमाणात खड्ड्यांचे साम्राज्य पसरल्याने वाहनचालकांना जीव मुठीत धरून वाहने चालवावी लागत आहेत. दरवर्षी या पुलाच्या दुरुस्तीवर लाखोंचा निधी खर्च करूनही पावसाळ्याच्या सुरुवातीलाच पुलावरील खड्ड्यांचा त्रास सुरू झाला आहे. आतापर्यंत यावर केलेला कोट्यवधींचा निधीही खड्ड्यात गेल्याची लाखाेली या पुलावरून जाणारे वाहनचालक वाहत आहेत.
भिवंडी शहरातील मुख्य रस्त्यावरील वाहतूककोंडीची समस्या सुटावी म्हणून हा उड्डाणपूल २००६ मध्ये उभारण्यात आला. हा पूल सुरुवातीपासूनच कमकुवत आहे. तीन वर्षांपासून अवजड वाहनांसाठी तो बंद केला आहे. दोन महिन्यांपूर्वी या उड्डाणपुलाच्या दुरुस्तीवर सात कोटींचा खर्च केला हाेता. अजूनही दिखाव्यापुरते हे दुरुस्ती काम सुरूच आहे, मात्र अजूनही उड्डाणपूल पूर्ण क्षमतेने सुरू केलेला नाही. त्याच वेळी या उड्डाणपुलावर पडलेले खड्डे हे वाहनधारकांसाठी जीवघेणे ठरत आहेत. हा उड्डाणपूल सुरुवातीपासून नादुरुस्त असल्याने त्याच्या डागडुजीकडे नेहमीच दुर्लक्ष सुरू आहे.
तीन वर्षांपूर्वी उड्डाणपुलाला भगदाड पडल्याने हा पूल अवजड वाहनांसाठी बंद केला आहे. तर, या उड्डाणपुलाच्या दुरुस्तीसाठी शासनाकडून सुमारे सात कोटी मंजूर झाल्यावर येथील उड्डाणपुलाच्या दुरुस्तीस सुरुवात झाली. कल्याण नाक्यावरून धामणकर नाका दिशेने जाणाऱ्या मार्गिकेचे दुरुस्ती पूर्ण झाली. त्यानंतर, पावसाळा सुरू झाल्याने उर्वरित भागातील दुरुस्ती रखडली आहे. आता या उड्डाणपुलावर मोठमोठे खोल खड्डे पडल्याने या पुलावरून ये-जा करणाऱ्या दुचाकी व हलके वाहनचालक मेटाकुटीला आले असून या खड्ड्यांमुळे अनेक अपघात या रस्त्यावर होत आहेत. तर, खड्ड्यात आपटून वाहने नादुरुस्त होत असल्याने चालकांना आर्थिक फटका बसत आहे. पुलावरच्या खड्ड्यांच्या दुरुस्तीकडे भिवंडी महापालिकेचे दुर्लक्ष होत असल्याने नागरिकांतून तीव्र नाराजी व्यक्त हाेत आहे. दुर्लक्ष करणाऱ्या ठेकेदारावर कारवाई करून लवकर उड्डाणपुलावरील खड्डे दुरुस्त करण्याची मागणी नागरिकांसह चालकांकडून केली जात आहे.