मीरा रोड : मीरा-भाईंदर महापालिकेच्या स्थायी समिती सभापतीपदी माजी आमदार नरेंद्र मेहता समर्थक दिनेश जैन विजयी झाले. शिवसेनेच्या नगरसेवकांनी छत्रपती शिवाजी महाराजांच्या पुतळ्यास विरोध करणारे जैन यांचा निषेध करत सभात्याग केला. महाराजांच्या पुतळ्यास विरोध करण्याचा ठराव मांडला म्हणून भाजपने जैन यांना सभापतीपदाची दिलेली बक्षिसी असल्याची टीका सेनेने केली. मेहता विरोधी गटातील दोन्ही उमेदवारांचे अर्ज एकमेकांना सूचक-अनुमोदक राहिल्याने बाद ठरले.
सभापतीपदासाठी जैन, तर मेहता विरोधक गटातील राकेश शाह व सुरेश खंडेलवाल यांनी उमेदवारी अर्ज भरल्याने भाजपतील मतभेद चव्हाट्यावर आले होते. दुसरीकडे शिवसेनेच्या वतीने कमलेश भोईर यांनी अर्ज भरला होता. स्थायी समितीच्या बैठकीत दिनेश जैन व भाजप नगरसेवकांनी छत्रपती शिवाजी महाराजांचा ३० फूट पुतळा बनवण्याच्या कामास विरोध करत प्रशासनाचा प्रस्ताव बैठकीत फेटाळून लावल्याने भाजपवर टीकेची झोड उठली. शिवसेना नगरसेवकांनी मतदान न करता संताप व्यक्त केला.
शाह व खंडेलवाल हे दोन्ही उमेदवार असताना त्यांनी एकमेकांना सूचक व अनुमोदक दिले असल्याने बुधवारी निवडणूक प्रक्रिया सुरू झाली, त्यावेळी नियमाप्रमाणे त्यांचे अर्ज बाद ठरले. दरम्यान, शिवसेनेने सभात्याग केल्याने जैन यांना भाजपची १० मते मिळाली, तर काँग्रेसचे दोन नगरसेवक तटस्थ राहिले. जैन यांच्या विजयानंतर मेहता समर्थकांनी एकच जल्लोष केला. महापौर ज्योत्स्ना हसनाळे, उपमहापौर हसमुख गेहलोत आदी पदाधिकाऱ्यांसह मेहता, मेहता समर्थक नगरसेवक, पदाधिकारी आदींनी जैन यांचे अभिनंदन केले. निवडणुकीआधी मेहता समर्थक स्थायी समिती सदस्यांना वरसावे येथील मेहतांच्या सी एन रॉक हॉटेलमध्ये ठेवले होते, असे सूत्रांनी सांगितले.
कोरोना संसर्ग नियमांना हरताळ
कोरोना संसर्गाचे नियम पालिका मुख्यालयातच पायदळी तुडवण्यात आले. सोशल डिस्टन्सिंग पुरते धाब्यावर बसवले. शिवाय महापौर, मेहतांसह बहुतांश नगरसेवक, पदाधिकाऱ्यांनी पालिका मुख्यालयातच मास्कही घातले नव्हते.