ठाणे : पूर्ववैमनस्यातून महेंद्र दुनघव (वय २१, रा. माजीवडा, ठाणे) या तरुणावर दिनेश अहिरे, बाळकृष्ण साटम, दीपक अहिरे आणि अक्षय दोंडके या चौघांनी चाकूने खुनीहल्ला केल्याची घटना नुकतीच घडली. याप्रकरणी चौघांविरुद्ध कापूरबावडी पोलीस ठाण्यात खुनाचा प्रयत्न केल्याचा गुन्हा गुरुवारी रात्री दाखल झाला.
माजीवडा, साईनाथनगर भागात राहणाऱ्या दिनेश याच्यासह चौघांनी आपसात संगनमत करून महेंद्र याला कोणतेही कारण नसताना जुन्या गोष्टीचा राग मनात धरून ५ जुलै २०२१ रोजी रात्री ११.४० वाजण्याच्यासुमारास वाद घातला. यातूनच त्याला शिवीगाळ करून मारहाणही केली. नंतर दीपक, अक्षय आणि बाळकृष्ण यांनी त्याचे हातपाय पकडले, तर दिनेश याने त्याच्याकडील चाकूने महेंद्रच्या छातीच्या डाव्या भागावर वार केले. यात तो गंभीर जखमी झाला. त्याला स्थानिकांनी सुरुवातीला ठाण्यातील छत्रपती शिवाजी महाराज रुग्णालयात उपचारासाठी दाखल केले. त्याची प्रकृती चिंताजनक झाल्याने त्याला सायन येथील लोकमान्य टिळक रुग्णालयात दाखल केले आहे. हल्ल्यानंतर चौघेही पसार झाले असून, त्यांचा शोध घेण्यात येत असल्याचे वरिष्ठ पोलीस निरीक्षक अनिल देशमुख यांनी सांगितले.