ठाणे : किराणा दुकानात वही खरेदीसाठी गेलेल्या अल्पवयीन मुलीचा विनयभंग करणाऱ्या मदन प्रजापती (२४, रा.नेरुळ, नवी मुंबई) याला ठाणे जिल्हा (विशेष पोस्को) न्यायाधीश के.डी. शिरभाते यांनी पाच वर्षे सश्रम कारावास आणि दोन हजार रुपये दंडाची शिक्षा सोमवारी सुनावली. दंड न भरल्यास त्याला तीन महिने सश्रम कारावासाची अतिरिक्त शिक्षाही सुनावली आहे.
पीडित १२ वर्षीय मुलगी ६ जुलै, २०१५ रोजी सायंकाळच्या वेळी प्रजापती याच्या किराणा दुकानात वही खरेदीसाठी गेली होती, तेव्हा आरोपीने मुलीला वही दाखविण्याच्या बहाण्याने दुकानात बोलविले. तिला चॉकलेटचे आमिष दाखवून तिचा विनयभंग केला. या प्रकरणी नेरुळ पोलीस ठाण्यात गुन्हा दाखल झाल्यानंतर त्याला पोलिसांनी अटक केली होती. या प्रकरणाचा तपास करून, पोलिसांनी ठाणे न्यायालयात दोषारोपपत्र दाखल केले. हा खटला विशेष पोस्को न्यायालयाच्या न्यायाधीश के.डी. शिरभाते यांच्यासमोर सुनावणीसाठी आल्यानंतर, सरकारी वकील संजय मोरे यांनी सादर केलेले पुरावे आणि सहा साक्षीदारांची साक्ष न्यायालयाने ग्राह्य मानली. त्या आधारे आरोपीला पाच वर्षे सश्रम कारावास आणि दोन हजार रुपये दंड अशी शिक्षा सुनावली. या प्रकरणाचा तपास तत्कालीन सहायक पोलीस निरीक्षक मंगेश पालांडे यांनी केला. पैरवी अधिकारी म्हणून पोलीस हवालदार प्रभाकर महाजन यांनी काम पाहिले.