------
रिक्षाची दुचाकीला धडक
कल्याण : उल्हासनगरमध्ये राहणारे महेश बेले हे संकेत भंडारेसह दुचाकीने बुधवारी संध्याकाळी ७ च्या सुमारास मुरबाड रोडने उल्हासनगर येथे जात होते. त्यावेळी कल्याण जिल्हा सत्र न्यायालयाच्या बाहेरील रोडवर समोरून येणाऱ्या भरधाव रिक्षाची त्यांच्या दुचाकीला जोरदार धडक बसली. यात दुचाकीवरील महेश आणि संकेत हे दोघेही जखमी झाले. दुचाकीचेही नुकसान झाले. याप्रकरणी महेश यांनी दाखल केलेल्या तक्रारीवरून रिक्षाचालक उत्तरेश्वर जगताप याच्याविरोधात महात्मा फुले चौक पोलीस ठाण्यात गुन्हा नोंद झाला आहे.
---
दुचाकी चोरीला
कल्याण : रहिम शेख यांनी त्यांची दुचाकी ते राहत असलेल्या पश्चिमेकडील मौलवी कम्पाउंड परिसरातील मुन्ना मौलवी बिल्डिंगच्या समोर पार्क केली होती. तेथून ती चोरीला गेल्याची घटना मंगळवारी मध्यरात्री घडली. याप्रकरणी रहिम यांच्या तक्रारीवरून बाजारपेठ पोलीस ठाण्यात गुन्हा दाखल झाला आहे.
----
व्हॅनची चोरी
कल्याण : पूर्वेकडील तिसगाव रोड परिसरात राहणारे राजेंद्र आसवले यांनी त्यांच्या ताब्यातील व्हॅन ते राहत असलेल्या शिवनेरी कॉलनीसमोर पार्क केली होती. तेथून ती चोरीला गेल्याची घटना २० मेच्या मध्यरात्री घडली. याप्रकरणी कोळसेवाडी पोलीस ठाण्यात आसवले यांनी दिलेल्या तक्रारीवरून गुन्हा नोंद झाला आहे.
----
क्षुल्लक कारणावरून मारहाण
डोंबिवली : दुचाकी खाली का पाडली या कारणावरून रामा ऊर्फ रामदास समाधान धवसे, विजय कसबे, अमोल आंभोरे ऊर्फ पुंगळ्या या तिघांनी मंगेश मारुती कांबळे यांना लोखंडी पाइप आणि बांबूने बेदम मारहाण केल्याची घटना सोमवारी रात्री ९ च्या सुमारास त्रिमूर्तीनगरमध्ये घडली. याप्रकरणी मंगेश यांनी दिलेल्या तक्रारीवरून तिघांविरोधात रामनगर पोलीस ठाण्यात गुन्हा नोंद झाला आहे.
----
खर्च मागितला म्हणून मारहाण
कल्याण : पश्चिमेकडील आंबिवलीत राहणारे शब्बीर शेख यांनी त्यांच्या दुकानाचा गाळा मुस्ताद सय्यद याला भाड्याने दिला आहे. त्या गाळ्याचे नवीन ॲग्रिमेन्ट करण्यासाठी एक हजार रुपये लागणार होते. त्यातील ५०० रुपयाचा खर्च मागितल्याच्या रागातून मुस्तादने शब्बीर यांना बेदम मारहाण केली. यात शब्बीर यांच्या हाताला आणि छातीला गंभीर दुखापत झाली आहे. ही घटना बुधवारी दुपारी दीड वाजता मोहने लहुजीनगर येथे घडली. याप्रकरणी खडकपाडा पोलीस ठाण्यात मुस्तादविरोधात गुन्हा दाखल झाला आहे.
----
मोबाइल लंपास
डोंबिवली : दरवाजावाटे घरात शिरून चोरी करण्याचे प्रकार वाढले असून, कल्याणपाठोपाठ आता डोंबिवलीतील पश्चिम भागातील घनश्याम गुप्ते रोडवर बुधवारी सकाळी सकाळी साडेसात ते आठच्या दरम्यान घडली. येथील मारुती स्मृती बिल्डिंगमध्ये राहणाऱ्या प्रियंका धुरी यांच्या घरातील १५ हजाराचा मोबाइल चोरट्याने दरवाजावाटे आतमध्ये शिरून लंपास केला आहे. याप्रकरणी विष्णुनगर पोलीस ठाण्यात गुन्हा नोंद झाला आहे.
--------------