रस्त्यावरील शेवाळामुळे तरुणाचा मृत्यू

मुंब्रा : पावसाच्या पाण्यामुळे रस्त्यावर जमा झालेल्या शेवाळावरून सायकल घसरल्यामुळे झालेल्या अपघातात अशरफ शेख (१८) या तरुणाचा मृत्यू झाल्याची घटना उघडकीस आली. तो मुंब्रा रेल्वेस्थानकाजवळील बॉम्बे कॉलनीतील वसीम अपार्टमेंट या इमारतीमध्ये राहत होता. मंगळवारी रात्री तो गावदेवी वसाहत ते सम्राटनगरच्या दरम्यान असलेल्या रस्त्यावरून सायकलवरून सम्राटनगरच्या दिशेने येत होता. येथील रस्त्यावरून वाहत असलेल्या पावसाच्या पाण्यामुळे ठिकठिकाणी रस्त्यावर जमा झालेल्या शेवाळामुळे रस्ता निसरडा झाल्याने त्याची सायकल घसरली. यामुळे संतुलन बिघडल्याने तो रस्त्याच्या जवळ असलेल्या विद्युतखांबांवर जाऊन आदळला. यात गंभीर जखमी झाल्याने त्याचा घटनास्थळावर मृत्यू झाला. दरम्यान, पावसाळ्यामध्ये येथील रस्त्यावरून जाणारे पादचारीदेखील पाय घसरून पडून जखमी होत असल्याच्या घटना वारंवार घडत आहेत. यामुळे रस्त्यावर येणारे डोंगराच्या पाण्याचा योग्य पद्धतीने निचरा व्हावा, पाणी रस्त्यावर येऊ नये, यासाठी रस्त्याच्या खालून पाइप टाकण्याची मागणी स्थानिक नागरिकांनी केली आहे.