ठाणे : इमारतीच्या कंपाऊंडची ४५ फुटांची संरक्षण भिंत आणि झाड त्या परिसरात उभ्या केलेल्या तीन गाड्यांवर पडल्याची घटना मध्यरात्री सोमवारी वागळे इस्टेट येथे घडली. यामध्ये कोणालाही दुखापत झाली नसली तरी गाड्यांचे नुकसान झाल्याची माहिती ठाणे महापालिकेच्या प्रादेशिक आपत्ती व्यवस्थापन कक्षाच्या अधिकाऱ्यांनी दिली. मंगळवारी दिवसभर शहरात पावसाचा जोर वाढल्याचे दिसून आले. परंतु, सायंकाळी पावसाचा जोर काहीसा ओसरल्याचेही दिसून आले.
वागळे इस्टेट, जुन्या पासपोर्ट ऑफिस जवळील अँफोटेक पार्कची सुमारे ४५ फुटांची संरक्षण भिंत व १ झाड सोमवारी मध्यरात्री १.३० वाजण्याच्या सुमारास त्या भिंतीलगत उभ्या केलेल्या तीन आलिशान चारचाकी वाहनांवर पडले. या संदर्भातील माहिती मिळताच ठामपा आपत्ती आणि अग्निशमन विभागाने घटनास्थळी धाव घेत, गाड्यांवर पडलेले झाड कापून बाजूला केले. त्यातच रात्रीची वेळ आणि पाऊस सुरूच असल्याने या घटनेत कोणालाही दुखापत झालेली नाही, अशी माहिती आपत्ती व्यवस्थापन कक्षाच्या अधिकाऱ्यांनी दिली.
४३ मिमी पावसाची नोंद
ठाणे शहरात दिवसभरात ४३ मिमी पावसाची नोंद झाली आहे. तसेच मंगळवारी सकाळपासून पाऊस पडत असल्याने दुपारपर्यंत सूर्यनारायणाचे दर्शन दुर्लभ झाले होते. तर आतापर्यंत शहरात १३०९.२६ मिमी नोंद झाली असून गतवर्षी याचदरम्यान १०९५.४४ मिमी पाऊस झाल्याची माहिती आपत्ती कक्षाने दिली.