ठाणे : हरिनिवास आणि लोकपुरम येथे पडलेले झाड आणि सोसायटीच्या संरक्षित भिंतीमुळे या परिसरात उभ्या असलेल्या सहा आलिशान मोटारकारचे मोठे नुकसान झाले. विशेष म्हणजे या दोन्ही घटना मंगळवारी पहाटेच्या सुमारास काही तासांच्या अंतरावर घडल्या. सुदैवाने यामध्ये कोणतीही जीवितहानी झाली नसल्याची माहिती सूत्रांनी दिली.
लोकपुरम येथील ज्योतिर्मय या सोसायटीची ५० ते ५५ फूट उंच असलेली संरक्षक भिंत मंगळवारी पहाटे सव्वादोन वाजण्याच्या सुमारास अचानक कोसळली. यावेळी त्या ठिकाणी उभ्या केलेल्या चार मोटारकारवर तिचा काही भाग कोसळल्यामुळे या वाहनांचेही मोठे नुकसान झाले. यामध्ये कोणीही जखमी झालेले नाही. त्याचबरोबर दुसऱ्या एका घटनेत हरिनिवास सर्कल येथे अचानक वृक्ष उन्मळून पडण्याचीही घटना मंगळवारी सकाळच्या सुमारास घडली. हे झाडही त्या ठिकाणी उभ्या केलेल्या दोन मोटारकारवर पडले. त्यामुळे त्या वाहनांचेही नुकसान झाले. या घटनेतही कोणीही जखमी झालेले नाही. या घटनेची माहिती मिळताच ठाणे महापालिकेच्या अग्निशमन दलाच्या जवानांनी घटनास्थळी धाव घेतली. तसेच रस्त्याला अडथळा होत असलेले झाडही तातडीने बाजूला केल्याची माहिती ठामपा आपत्ती व्यवस्थापन कक्षाचे प्रभारी अधिकारी संतोष कदम यांनी दिली.