भिवंडी : भ्रष्टाचारी मंत्री आणि ठाकरे सरकारला उघडे पाडणारच. फडतूस नाेटिसांना मी भीक घालत नाही, असा निर्धार भाजपचे माजी खासदार किरीट साेमय्या यांनी व्यक्त केला. गुरुवारी सायंकाळी त्यांनी भिवंडीतील धामणकर नाका मित्रमंडळाच्या सार्वजनिक गणपतीचे दर्शन घेतले. यावेळी त्यांनी पत्रकारांशी संवाद साधला.
मंडळाचे अध्यक्ष संतोष शेट्टी, पदाधिकारी मोहन बल्लेवार, विजय गुज्जा, दिलीप पोद्दार, हसमुख पटेल आदी यावेळी उपस्थित होते. राज्यातील साडेबारा काेटी जनतेची फसवणूक झाली आहे. आतापर्यंत २१ मंत्री आणि नेत्यांचे घाेटाळे उघड केले आहेत. माजी गृहमंत्री फरार आहेत. पाेलीस आयुक्ताचा पत्ता नाही. ज्यातील मंत्री अनिल परब यांचे रिसाॅर्ट, हाॅटेल ताेडून दाखवणार आहे. १८ महिन्यांत राज्यभरात २४ दुर्घटना घडल्या आहेत. भ्रष्टाचार, काेराेनामुळे जनता त्रस्त आहे. त्यांच्या पाठीशी उभे राहण्यासाठी आणि भ्रष्टाचारी सरकारला ठिकाणावर आणण्यासाठी शक्ती दे, अशी प्रार्थना त्यांनी यावेळी गणरायाच्या चरणी केली. यावेळी मंडळाच्यावतीने काेराेनाकाळात सेवाकार्य करणाऱ्या बीएनएन महाविद्यालय व ओसवाल महाविद्यालयाच्या एनसीसी व एनएसएस कॅडेट विद्यार्थ्यांचा गौरव सोमय्या यांच्या हस्ते करण्यात आला.